Вашингтон. 15 мамыр. ИНТЕРФАКС – Бейжің әзірге АҚШ Президенті Дональд Трамптың Қытай Халық Республикасы Boeing компаниясынан 200 ұшақ сатып алу туралы уағдаластыққа қол жеткізгені туралы мәлімдемесіне қатысты түсініктеме берген жоқ, деп хабарлайды жұма күні NBC телеарнасы.
«Қытай мен АҚШ ынтымақтастықты нығайту арқылы өздерінің дамуы мен жаңғыруына ықпал ете алады», — деп келтіреді телеарна ҚХР СІМ өкілі Го Цзякуньнің сөзін. Ол осындай мәміленің жасалу-жасалмауы туралы тікелей қойылған сұраққа осылай жауап берген.
Телеарна ведомство өкілінің аталған мәселеге қатысты нақты жауаптан жалтарғанына назар аударды.
Бұдан бөлек, журналистердің Трамптың ҚХР-ға сапары кезінде ауыл шаруашылығы саласында нақты қандай уағдаластықтарға қол жеткізілгені туралы сұрағына жауап бере отырып, Го Цзякунь АҚШ пен Қытайдың «экономикалық және сауда қатынастарының тұрақтылығын сақтау, әртүрлі салалардағы практикалық ынтымақтастықты кеңейту және келіспеушіліктерді тиісінше реттеу бойынша маңызды консенсусқа» келгенін атап өтті.
Бұған дейін Трамп Fox News телеарнасына берген сұхбатында Қытайдың Американың Boeing Co. компаниясынан 200 ұшаққа тапсырыс беруге келіскенін хабарлаған болатын.
«Бүгін ол (Қытай) 200 ұшаққа тапсырыс беруге келісті», — деді Трамп. Сондай-ақ ол Boeing компаниясы 150 ұшаққа тапсырыс болады деп күткенін атап өтті.
Өткен жылдың жазында батыс БАҚ-тары Boeing компаниясының Қытайға шамамен 500 ұшақ сату туралы келісім жасасуға жақын екенін хабарлаған еді.
Boeing компаниясының Қытаймен соңғы мәмілесі 2017 жылдың қарашасында Трамптың бұл елге жасаған алғашқы сапары кезінде жарияланды. Ол жалпы құны 37 млрд долларды құрайтын 300 ұшақты сатып алу бойынша тапсырыстар мен міндеттемелерді қамтыған болатын.
