Брюссель. 26 мамыр. ИНТЕРФАКС – Бельгияның Шығыс Фландрия провинциясында оқушыларды тасымалдап бара жатқан автобус Бюггенхаут коммунасындағы теміржол өткелінде пойызбен соқтығысты. Бельгия БАҚ-тары бірнеше адамның қаза тапқанын хабарлады.
«Бюггенхауттағы қайғылы жол апаты туралы хабарды терең күйзеліспен қабылдадым. Ойым қаза тапқандар мен олардың жақындарымен бірге. Зардап шеккендерге күш-қуат тілеймін», – деп жазды Бельгияның ішкі істер министрі Бернар Кентен X әлеуметтік желісінде.
Федералдық полиция әзірге апат құрбандарының нақты саны жөнінде ресми ақпарат таратқан жоқ. RTL телеарнасының хабарлауынша, құқық қорғау органдарының өкілі Ан Берже: «Қазіргі уақытта зардап шеккендер туралы мәлімет бермейміз. Алғашқы тексеру жұмыстарын теміржол полициясы жүргізді», – деді.
Апаттың мән-жайы анықталып жатыр. Le Soir газетінің мәліметінше, оқиға кезінде теміржол өткелі жабық болған.
Бұл ақпаратты Бельгияның теміржол инфрақұрылымын басқаратын Infrabel компаниясы да растады. БАҚ келтірген компания түсіндірмесінде: «Шлагбаумдар түсірілген, бағдаршамда қызыл шам жанып тұрған», – делінген.
Пойыз Бюггенхаутқа Брюггеден келе жатқан. Өткел станциядан шамамен бір шақырым жерде орналасқандықтан, пойыз жылдамдығы баяулай бастаған. Машинист автобусты көрген соң шұғыл тежеуді қолдануға тырысқанымен, соқтығыстың алдын алу мүмкін болмаған. Infrabel мәліметінше, соққы өте қатты болған.
Алдын ала деректер бойынша, пойыз жолаушылары арасында зардап шеккендер жоқ.
