Еуропада 15 жолаушылар ұшағына жарылғыш зат қойылғаны туралы жалған хабарламалар түсті

Лондон. 5 қараша. ИНТЕРФАКС — Еуропа елдерінде 15 авиалайнердің бортында жарылғыш құрылғылар болуы мүмкін деген хабарламалар түсіп, олардың жалған екені анықталды, деп хабарлайды бейсенбі күні Sky News телеарнасы.
«Жарылыс қаупі туралы ақпарат бүкіл Еуропа бойынша қатынайтын рейстерге келіп түсті — ұшақтар қонған бойда оларды полиция қызметкерлері мен саперлер қарсы алды», — деп хабарлайды телеарна.
Нәтижесінде үш әуе кемесі бағытын өзгертіп, басқа әуежайларға қонуға мәжбүр болды. Атап айтқанда, Aer Lingus авиакомпаниясының Дублиннен Римге бағытталған рейсі Францияның солтүстігіндегі Эвре қаласына, Ryanair компаниясының Лондоннан Софияға ұшқан рейсі Болгарияның Пловдив қаласына, ал Wizz Air компаниясының Миланнан Варшаваға қатынайтын ұшағы Венаға бағытталды.
Қалған 12 ұшақ бортта жарылғыш зат бар деген ескертулерге қарамастан, межелі әуежайларына аман-эсен қонды.
Бұл жағдайдан ең көп зардап шеккен — Ryanair компаниясының рейстері (төрт ұшақ), екінші орында — әрқайсысы екі ұшақтан қауіп төнген Wizz Air және Finnair компаниялары.
Жекелеп айтқанда, Yle телерадиокомпаниясының мәліметінше, сөз Хельсинкиден ұшып шыққан Finnair авиакомпаниясының екі ұшағы туралы болған. Ескерту хабарламалары Рим мен Венаға бағыт алған рейстерге түскен. Екі ұшақ та межелі жерлеріне аман-эсен қонды.
Еуропалық бұқаралық ақпарат құралдарының хабарлауынша, тексеру нәтижесінде 15 ұшақтың ешқайсысының бортынан жарылғыш зат табылған жоқ.
Сейсенбі күні де Еуропадағы жеті әуе рейсіне бортта жарылғыш құрылғылар бар деген ақпарат түсіп, олардың да барлығы жалған болып шыққан еді. Бұдан бөлек, осы жалған хабарламалардың салдарынан сейсенбіде Польшаның Варшавадағы Модлин әуежайы жұмысын уақытша тоқтатуға мәжбүр болды.