Париж. 10 қыркүйек. ИНТЕРФАКС – Францияның ішкі істер министрі Брюно Ретайоның мәлімдеуінше, сәрсенбі күні ел аумағында өткен «Бәрін бұғаттаймыз» атты наразылық қозғалысы аясындағы жаппай акцияларға шамамен 200 мың адам қатысқан. Бұл туралы Ouest-France басылымы хабарлады.
Министр бұл деректі үкіметаралық дағдарысқа қарсы комитеттің кешкі отырысынан кейін жария етті. Бұған дейін Франция ІІМ наразылыққа қатысушылар санын 175 мың деп көрсеткен болатын.
Ал елдегі ең ірі кәсіподақ ұйымы – Жалпы еңбек конфедерациясы (CGT) бұл көрсеткішті 250 мың адамға дейін жеткізді.
10 қыркүйек күні Францияның ірі қалаларында да, шағын елді мекендерінде де ереуілдер, митингілер, жолдарды, кәсіпорындар мен мекемелерді, вокзалдарды бұғаттау әрекеттері тіркелді.
Наразылық білдірушілер негізінен үкіметтің экономикалық саясатына қарсылық білдірді. Көптеген шерушілер ел президенті Эммануэль Макронның отставкасын талап еткен ұрандар көтерді.
Кейбір аймақтарда ереуілшілер полициямен қақтығысқа түсіп, жаппай тәртіпсіздіктер орын алды.
Өз кезегінде Ішкі істер министрі Ретайо елді бұғаттауды көздеген әрекеттердің сәтсіз аяқталғанын атап өтіп, құқық қорғау органдарының жұмысын жоғары бағалап, оларға алғыс білдірді.
