Астана. 11 қыркүйек. ИНТЕРФАКС-ҚАЗАҚСТАН – Бейсенбі күні өткен пленарлық отырыста Сенат депутаттары Мәжіліс мақұлдаған «Инновациялық қызмет саласын және мемлекеттік статистика жүйесін жетілдіру мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын екі оқылымда қарап, қабылдады.
Аталған құжат Парламент тарапынан толық қабылданып, Мемлекет басшысының қол қоюына жолданады.
«Заңның басты жаңалығы – Astana Hub кластерінің қызметін жетілдіруге бағытталған. Бұл – цифрлық даму стратегиясын жүзеге асырудың негізгі тетіктерінің бірі. Құжат инновациялық қызметке мемлекеттік қолдау жүйесін жетілдіруге және жаңа технологияларды енгізуге қолайлы орта қалыптастыруға бағытталған», – деді Сенат депутаты Шәкәрім Бұқтұғұтов.
Атап айтқанда, Astana Hub халықаралық технологиялық паркін «Инновациялық технологиялар паркі» қорымен біріктіріп, бірыңғай автономды кластерлік қор құру көзделген. Бұл шара стартаптарды және инновациялық бастамаларды қолдауды күшейтіп, жоғары технологиялық салаларға қосымша инвестициялар тартуға мүмкіндік береді.
Ш. Бұқтұғұтовтың айтуынша, құжат аясында байланыс операторлары немесе Қазақстан аумағында жұмыс істейтін байланыс желісі иелерінің абоненттік деректерін мемлекеттік статистика органдарына ұсынуына қатысты өзгеріс те қарастырылған.
«Бұл мәліметтер дербестендірілмей, тек статистикалық мақсатта пайдаланылатын болады», – деп нақтылады сенатор.
Заң аясында Азаматтық және Кәсіпкерлік кодекстерге, сондай-ақ он заңға өзгерістер енгізіледі.
