Нью-Йорк. 11 қыркүйек. – АҚШ-тың S&P 500 және Nasdaq қор индекстері сәрсенбі күнгі сауда қорытындысы бойынша тарихи шектерден асып, жаңа рекорд орнатты. Ал Dow Jones өнеркәсіптік индексі керісінше, аздап құлдырады.
АҚШ Еңбек министрлігінің деректеріне сәйкес, тамыз айында өндіруші бағалар индексі (PPI) алдыңғы аймен салыстырғанда 0,1%-ға төмендеген. Бұл – соңғы төрт айдағы алғашқы құлдырау. Сарапшылар керісінше 0,3% өсім болады деп болжаған еді. Мұндай күтпеген мәліметтер АҚШ-та тұтыну бағаларының өсу қарқыны баяулай түседі деген үмітті күшейтті.
Соның нәтижесінде нарық қатысушылары АҚШ Федералды резерв жүйесі келесі аптада базалық мөлшерлемені бірден 50 базистік тармаққа төмендетуі мүмкін деген болжамды күшейте түсті.
Сол күні Oracle Corp. акциялары бірден 36%-ға өсті. Бұл компанияның маусым–тамыз аралығындағы қаржылық тоқсанында бұлттық қызметтерден түскен табысы 28%-ға артқанымен байланысты. Жыл қорытындысы бойынша бұл көрсеткіштің 77%-ға жетуі болжанып отыр.
Сондай-ақ, GameStop компаниясы да екінші қаржы тоқсанында таза табысын едәуір ұлғайтып, бесінші тоқсан қатарынан шығынсыз жұмыс істеп келеді. Осыған байланысты оның акциялары 3,3%-ға өсті.
Lyft Inc. компаниясы Атланта қаласында қауіпсіздік жүргізушісімен бірге роботтандырылған такси қызметін сынақтан өткізуді бастағанын хабарлады. Бұл көліктер May Mobility Inc. жасаған автономды жүйемен жабдықталған. Осы жаңалыққа байланысты Lyft акциялары 3,1%-ға қымбаттады.
Vimeo Inc. акциялары бір күнде 61%-ға секіріп, өсім көрсетті. Себебі италиялық Bending Spoons компаниясы платформаны 1,38 миллиард долларға сатып алатыны белгілі болды. Сауда 2025 жылдың соңына дейін аяқталып, Vimeo биржадан шығарылмақ.
Сонымен қатар, Nvidia (3,9%), Broadcom (9,8%), AMD (2,4%), Cisco (1,2%), Microsoft (0,4%), Nike (0,9%), Tesla (0,2%) және Intel (1,4%) компанияларының да бағалы қағаздары қымбаттады.
Алайда кейбір ірі компаниялардың акциялары керісінше төмендеді. Apple Inc. акциялары жаңа iPhone 17 моделінің сәтсіз іске қосылуына байланысты 3,2%-ға арзандады. Сонымен қатар, Chewy Inc. акциялары 16,6%-ға, Amazon – 3,3%-ға, Salesforce – 3,8%-ға, McDonald’s – 2,1%-ға, Boeing және IBM – 0,9%-ға, Walmart – 1,8%-ға, Alphabet – 0,2%-ға төмендеген.
Dow Jones Industrial Average индексі 220,42 пунктке (-0,48%) төмендеп, 45 490,92 пунктті құрады.
Ал S&P 500 индексі 19,43 пунктке (+0,30%) өсіп, 6 532,04 деңгейіне жетті.
Nasdaq Composite индексі де 6,57 пунктке (+0,03%) артып, 21 886,06 деңгейінде сессияны аяқтады.
