Вашингтон. 8 қараша. ИНТЕРФАКС – Иранның Ислам революциясы сақшылары корпусы (ИРСК) баллистикалық зымырандардың ұшу қашықтығын 2 мың шақырымнан асырмау жөніндегі өзі белгілеген шектеуді алып тастағанын мәлімдеді. Бұл туралы Associated Press агенттігі хабарлады.
Тегерандағы баспасөз конференциясында зымырандардың ұшу қашықтығына қатысты сұраққа ИРСК-ның ресми өкілі, бригадалық генерал Хосейн Мохебби «Біз үшін бұл шектеу енді жоқ», – деп жауап берді.
Бұдан бірнеше күн бұрын Иранның жоғарғы басшысы аятолла Моджтаба Хомейни АҚШ немесе Израиль тарапынан қандай сипатта әрі қандай ауқымда қауіп төнсе де, Иран жауап беретінін ескерткен. Оның айтуынша, Иранның қарымта әрекеті ешқандай географиялық шекарамен шектелмейді.
Агенттіктің мәліметінше, әзірге Иранда 2 мың шақырымнан астам қашықтыққа ұша алатын зымырандар бар екені туралы дерек жоқ. Алайда америкалық ресми тұлғалар Иранның ғарыш бағдарламасында қолданылатын технологияларды құрлықаралық баллистикалық зымыран жасауға бейімдеуге болады деп мәлімдейді.
