Астана. 14 қаңтар. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен пленарлық отырыста «2021 жылы 16 ақпандағы Еуразиялық экономикалық одаққа мүше мемлекеттердің заңнамасын осы салада үйлестіру мақсатында Еуразиялық экономикалық одақтың техникалық регламенттері талаптарының сақталуына мемлекеттік бақылауды (қадағалауды) жүзеге асыру қағидаттары мен тәсілдері туралы келісімге өзгерістер енгізу жөніндегі хаттаманы ратификациялау туралы» заңды қабылдады.
Аталған хаттама 2024 жылы 8 мамырда Мәскеу қаласында қол қойылған.
Мәжілістің экономикалық реформа және өңірлік даму комитетінің қорытындысына сәйкес, құжат ЕАЭО құқығы мен одаққа мүше мемлекеттердің ұлттық заңнамасы арасындағы қайшылықтарды жоюға, сондай-ақ кәсіпкерлер үшін ықтимал беделдік тәуекелдерді төмендетуге бағытталған.
Хаттама арқылы келісім мәтініндегі бірқатар тұжырымдар нақтыланады. Атап айтқанда, құжаттың бүкіл мәтіні бойынша «қауіпті өнім туралы» деген тіркес «Одақтың техникалық регламенттерінің талаптарына сәйкес келмейтін өнім туралы» деген ұғыммен алмастырылады.
Заң әрі қарай Сенатқа жіберіледі.
