Мәскеу. 2 шілде. ИНТЕРФАКС – АҚШ пен Иран арасындағы шиеленістің реттелуіне қатысты оң күтулер мен Ормуз бұғазы арқылы мұнай жеткізілімдерінің қалпына келуіне байланысты бейсенбі күні мұнай бағасы төмендеуін жалғастырды.
Мәскеу уақытымен сағат 14:29-дағы мәлімет бойынша, ICE Futures биржасында қыркүйек айындағы Brent маркалы мұнай фьючерстерінің бағасы бір баррель үшін 70,35 АҚШ долларын құрады. Бұл алдыңғы сауда сессиясының жабылу бағасынан 1,22 долларға (1,7%) төмен.
Ал Нью-Йорк тауар биржасындағы (NYMEX) электрондық сауда алаңында тамыз айындағы WTI мұнайының фьючерстері 1,28 долларға (1,87%) арзандап, барреліне 67,3 АҚШ долларына дейін төмендеді.
Қатар Сыртқы істер министрлігінің ресми өкілі Мәжид әл-Ансаридің айтуынша, сәрсенбі күні Дохада өткен АҚШ пен Иран арасындағы жанама келіссөздер барысында ілгерілеу байқалған. Оның сөзінше, тараптар келіссөздерді жақын уақытта жалғастыруға уағдаласқан. Келесі кездесу Иранның бұрынғы Жоғарғы көшбасшысы аятолла Әли Хаменейді жерлеу рәсімінен кейін мүмкіндігінше қысқа мерзімде өтеді деп жоспарланып отыр.
MUFG сарапшысы Суджин Кимнің пікірінше, мұнай ұсынысының артуы және геосаяси тәуекелге байланысты қосымша үстемеақының төмендеуі мұнай бағасына қысым жасауды жалғастырады. Сонымен қатар келіссөздердің сәтсіз аяқталуы немесе қауіпсіздікке қатысты жаңа оқиғалар нарықтағы құбылмалылықты қайта күшейтуі мүмкін.
OCBC Group Research сарапшыларының бағалауынша, АҚШ пен Иран арасында өзара түсіністік туралы меморандумға қол қойылғаннан кейін Ормуз бұғазы арқылы теңіз тасымалының, тиісінше мұнай жеткізілімдерінің көлемі ұлғайған. Нарық қатысушылары жеткізілімдердің қалыпты деңгейге оралуын күткендіктен, мұнай бағасы қақтығысқа дейінгі деңгейге жақындады. Осыған байланысты нарықта ұсыныстың артық болуы жөніндегі пікірлер қайта айтыла бастады.
Осыған байланысты OCBC сарапшылары биылғы үшінші тоқсанда Brent маркалы мұнайдың орташа бағасына қатысты болжамын бір баррель үшін 85 доллардан 75 долларға, ал төртінші тоқсанға арналған болжамын 80 доллардан 75 долларға дейін төмендетті.
Өз кезегінде UBS банкі де Brent мұнайының бағасына қатысты болжамын қайта қарады. Банк енді 2026 жылдың үшінші және төртінші тоқсандарында мұнайдың бұл маркасының орташа бағасы бір баррель үшін 80 АҚШ долларын құрайды деп күтеді. Бұл алдыңғы болжаммен салыстырғанда тиісінше 25 және 10 долларға төмен.
