Астана. 16 қыркүйек. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев ауыл шаруашылығы дақылдарының егіс алқаптарын әртараптандыруды жалғастырып, жоғары табысты, рентабельді дақылдарды өсіруге басымдық беру қажет екенін мәлімдеді. Бұл туралы Мемлекет басшысының баспасөз қызметі хабарлады.
«Егіс алқаптарын әртараптандыру ісін жалғастырып, пайдасы жоғары ауыл шаруашылығы дақылдарын өсіруге басымдық беру керек. Бұл өсімдік шаруашылығының жалпы құнын арттыруға мүмкіндік береді», – деді Президент Ақмола облысындағы егін жинау науқанына арналған көшпелі кеңесте.
Тоқаев сондай-ақ үкімет пен өңір әкімдері егін орағы кезінде шаруаларды жанар-жағармаймен үздіксіз қамтуға, уақтылы қаржыландыруға және қажетті ауыл шаруашылығы техникасына қолжетімділікті қамтамасыз етуге міндетті екенін атап өтті.
«Ауа райына қарамастан, егін шығынын азайтып, өнімді толық көлемде жинау қажет», – деді ол.
Бұдан бөлек, Мемлекет басшысы 2026 жылғы көктемгі егіс науқанын тиімді өткізу үшін жеңілдетілген ерте қаржыландыру бағдарламасын іске қосудың маңыздылығын атап өтті.
Биыл Қазақстанда егіс алқаптарын әртараптандыру бағдарламасы аясында бидай егісі 6,1%-ға қысқарып, маржиналды дақылдар – бұршақ тұқымдастардың көлемі 1,6 есе, майлы дақылдар 46%-ға ұлғайтылған.
