Астана. 25 қазан. ИНТЕРФАКС-ҚАЗАҚСТАН.
Ресей Федерациясының Президенті Владимир Путин ұлттық мереке — Республика күніне орай Қазақстан Президенті Қасым-Жомарт Тоқаевтың атына құттықтау жеделхатын жолдады. Бұл туралы Қазақстандағы Ресей елшілігінің баспасөз қызметі хабарлады.
Жеделхатта: «Ресей мен Қазақстан арасындағы қарым-қатынас өте жоғары деңгейде. Екі ел ТМД, Еуразиялық экономикалық одақ, ҰҚШҰ, ШЫҰ және өзге де көпжақты құрылымдар аясында тиімді ынтымақтастық орнатып келеді. Бірлескен күш-жігердің арқасында Мәскеу мен Астана арасындағы стратегиялық әріптестік пен одақтастық қатынастарды барынша дамытуға сенімдімін», – делінген.
Путин өз сөзінде алдағы Тоқаевтың Ресейге жасайтын мемлекеттік сапары да екіжақты байланыстардың нығаюына серпін беретінін атап өтті.
«Құрметті Қасым-Жомарт Кемелұлы, Сізге зор денсаулық және табыс тілеймін. Қазақстан халқына амандық пен молшылық бұйырсын», – деп жазды Владимир Путин.
