Астана. 25 қазан. ИНТЕРФАКС-ҚАЗАҚСТАН.
Мемлекет басшысы Қасым-Жомарт Тоқаев сенбі күні Ұлттық қауіпсіздік комитетінің төрағасы Ермек Сағымбаевты қабылдады. Бұл туралы Президенттің баспасөз қызметі хабарлады.
Кездесуде Президент ведомствоның жыл басынан бергі негізгі жұмыс қорытындысын және алдағы кезеңге арналған міндеттерді тыңдады.
Хабарламада көрсетілгендей,
«Ермек Сағымбаев ұлттық қауіпсіздік органдарының экстремизм мен терроризмге қатысы бар 67 адамды ұстағанын баяндады. Радикалды идеология жақтастарының 83-і сотталды. Ішкі істер министрлігімен бірлескен шаралар нәтижесінде 17 қылмыстық топтың әрекетіне тосқауыл қойылып, 244 қатысушы ұсталды, 96 адамға қатысты қамауға алу бұлтартпау шарасы санкцияланды».
Сонымен қатар заңсыз айналымнан 453 қару, 64 граната, шамамен 6 мың оқ-дәрі тәркіленген. 16 есірткі зертханасы, 25 халықаралық және 19 өңірлік есірткі арналарының жолы кесілді. Жалпы 20 тоннаға жуық есірткі заты, соның ішінде 13 тонна колумбиялық кокаин және 10 тонна прекурсор тәркіленді.
Баспасөз хабарламасында атап өтілгендей «Экономикалық қауіпсіздікті қамтамасыз ету және сыбайлас жемқорлыққа қарсы іс-қимыл аясында мемлекетке келтірілуі мүмкін 3,8 триллион теңге көлеміндегі залалдың жолы кесілді, бюджетке 255 миллиард теңге өндірілді. Коррупция фактілері бойынша 91 қылмыстық іс қозғалды».
Кездесу қорытындысы бойынша Мемлекет басшысы ұлттық қауіпсіздік органдарының қызмет бағыттарына қатысты бірқатар нақты тапсырма берді.
