Астана. 25 қазан. ИНТЕРФАКС-ҚАЗАҚСТАН.
Қазақстан Президенті Қасым-Жомарт Тоқаев отандастарын Республика күнімен құттықтады. Құттықтау мәтінін Мемлекет басшысының баспасөз қызметі таратты.
«Құрметті отандастар! Сіздерді шын жүректен Республика күнімен құттықтаймын! Осыдан 35 жыл бұрын біз Тәуелсіздік туралы Декларация қабылдап, тың тарихи кезеңге қадам бастық. Бұл тағдыршешті құжат халқымыздың өз болашағын өзі айқындау құқығын бекітіп, қазіргі заманауи мемлекеттің негізін қалады», – делінген Президенттің құттықтауында.
Мемлекет басшысының айтуынша, осы жылдар ішінде еліміз үлкен де күрделі жолдан өтті: «Тәуелсіздіктің саяси әрі экономикалық іргетасы қаланды, халықаралық деңгейде мойындалған шекарамыз бекітілді, жаңа астана салынды, ұлттық бірегейлікті нығайту және халықтың әл-ауқатын жақсарту бағытында айтарлықтай нәтижелерге жеттік».
Қасым-Жомарт Тоқаев еліміздің сыртқы саясатының тиімді жүзеге асырылуы Қазақстанның халықаралық беделін арттырғанын атап өтті. «Қиындығы мол кезеңге қарамастан, біз Әділетті Қазақстанды – барлық азаматқа тең мүмкіндік беретін елді құрудамыз. Саяси, экономикалық және әлеуметтік реформалар мемлекетіміздің өркендеуіне, халқымыздың тұрмысын жақсартуға бағытталған», – деді Президент.
Мемлекет басшысы әрбір қазақстандықтың басты міндеті – Тәуелсіздікті нығайтып, елді дамыған, өркениетті және әділетті мемлекетке айналдыру екенін атап өтті.
«Көк туымыз мәңгі желбірей берсін! Барша отандастарыма зор денсаулық, бақ-береке және жаңа жетістіктер тілеймін!» – делінген құттықтау сөзінде.
