Астана. 20 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев республиканың Газаны тұрақтандыру және қалпына келтіру жөніндегі халықаралық күш-жігерге қосылуға дайын екенін мәлімдеді.
«Қазақстан іскерлік беделі расталған және жоғары құзыретке ие халықаралық компаниялар арқылы қалпына келтіру және құрылыс үдерістеріне қатысуға мүдделі. Бұл бағдарлама инфрақұрылым, тұрғын үй, мектептер, ауруханалар және басқа да маңызды әлеуметтік нысандар салуды қамтуы мүмкін», — деді Тоқаев Вашингтонда өткен Бейбітшілік кеңесінің алғашқы саммитінде.
Мемлекет басшысының сөзін баспасөз қызметі таратты.
Сонымен қатар Қазақстан бидай өндіру бойынша әлемдегі ірі елдердің бірі ретінде Газада және одан тыс жерлерде азық-түлік қауіпсіздігін қамтамасыз ету мақсатында гуманитарлық көмек көрсетуге дайын.
Президенттің айтуынша, Қазақстан алдағы бес жыл ішінде палестиналық студенттерге өз университеттерінде білім алу үшін 500-ден астам білім беру грантын бөлуді жоспарлап отыр.
«Бұдан бөлек, біз электрондық үкімет саласындағы халықаралық деңгейде мойындалған тәжірибемізбен және өзге де цифрлық шешімдермен бөлісе аламыз. Қазақстан медициналық бөлімшелерді далалық госпитальмен бірге жіберу, сондай-ақ Азаматтық-әскери үйлестіру орталығына бақылаушылар жолдау арқылы Халықаралық тұрақтандыру күштерін қолдауға дайын», — деп атап өтті Тоқаев.
