АСТАНА. 12 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Ресей Президенті Владимир Путин Мәскеуде өткен келіссөздердің қорытындысы бойынша екі ел арасындағы мемлекетаралық қатынастарды жан-жақты стратегиялық әріптестік пен одақтастық деңгейіне көтеру жөніндегі Декларацияға қол қойды.
Құжатқа қатысты пікір білдірген Қасым-Жомарт Тоқаев: «Бұл декларация тарихи мәнге ие. Ол өзара сенімнің мызғымастығын және халықтарымыз арасындағы ынтымақтастықтың кең мүмкіндіктерін айқын көрсетеді», – деді.
Осыған байланысты Мемлекет басшысы Владимир Владимирович Путинге екіжақты қатынастарды нығайтуға қосқан жеке үлесі үшін алғыс білдірді.
«Біз Қазақстанда Ресей Президентін бүкіл әлемде танымал, жаһандық деңгейдегі мемлекет қайраткері ретінде жақсы білеміз әрі құрметтейміз. Оның есімі – осы тұрақсыз дүниеде орыс халқы мен Ресей мемлекетінің мүдделерін қорғау жолындағы сенім мен табандылықтың символы ретінде қабылданады», – деді Тоқаев.
Сондай-ақ ол Қазақстанның Ресей Федерациясының өркендеуіне шынайы мүдделі екенін атап өтті.
