АСТАНА. 12 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ресей Федерациясын елдің ең ірі экономикалық серіктесі деп атады.
«Ресей – Қазақстанның ең ірі сауда және инвестициялық әріптесі. Екі ел арасындағы тауар айналымы 28 млрд АҚШ долларынан асты. Бұл көрсеткішті 30 млрд долларға жеткізу бағытында жүйелі жұмыс жүргізілуде», – деді Мемлекет басшысы Қазақстан мен Ресейдің XXI Өңіраралық ынтымақтастық форумының пленарлық сессиясында бейнебайланыс арқылы сөйлеген сөзінде.
Президенттің айтуынша, өткен жылы Ресейден Қазақстанға тартылған инвестициялар көлемі рекордтық 4 млрд долларға жеткен. Бүгінде елімізде ресейлік капиталдың қатысуымен 20 мыңнан астам компания жұмыс істейді.
«Мұндай ауқымды көрсеткіштер біздің өзара іс-қимылымыздың жоғары қарқынын айқын дәлелдейді. Бұл жетістіктермен шектеліп қалмай, сауда мен инвестиция көлемін одан әрі арттыра беруіміз қажет деп санаймын», – деді Қасым-Жомарт Тоқаев.
