АСТАНА. 12 қараша. ИНТЕРФАКС-ҚАЗАҚСТАН – Мәжіліс сәрсенбі күні өткен пленарлық отырыста Сенат ұсынған «Мәдениет, білім беру, отбасы және мемлекеттік бақылау мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасының жекелеген баптарына енгізілген редакцияларды қолдап дауыс берді.
Осылайша, құжат парламент тарапынан толық мақұлданып, Мемлекет басшысының қол қоюына жіберіледі.
Сенат депутаттары заң жобасында қарастырылған вокалдық фонограммаларды қолдануға шектеу қою туралы норманы тұжырымдамалық тұрғыда қолдап, оған нақты редакциялық түзетулер енгізді. Сонымен қатар, балаларға арналған ұйымдарға мемлекеттік бақылау жүргізудің ерекше тәртібін айқындайтын нормалардың күшіне ену мерзімдері де келісілді.
Бұған дейін Сенат концерттік іс-шараларда, көрермен саны 200 адамнан асқан жағдайда, вокалдық фонограммаларды қолдануға тыйым салу туралы норманы нақтылаған болатын. Мұндай фонограммалар тек телебағдарламалар жасау кезінде және концерт өткізуге бейімделмеген орындарда ғана қолдануға рұқсат етіледі.
Сонымен қатар, музыкалық шығармаларды орындау барысында немесе мәдени-көпшілік іс-шаралар кезінде вокалдық фонограммалар қолданылғаны туралы көрерменді алдын ала хабардар ету міндеті енгізілді.
Бұдан өзге, бұқаралық ақпарат құралдарында немесе онлайн платформаларда авторлық құқық нысандары болып табылатын шығармаларды көпшілік алдында пайдаланған жағдайда, жеке тұлғалардың автордың есімін көрсету міндетін көздейтін нормалар қолданыстағы заңнамаға сәйкестендірілді.
