Астана. 16 қазан. ИНТЕРФАКС-ҚАЗАҚСТАН – Қазақстан парламентінің Сенаты бейсенбі күні өткен жалпы отырыста Мәжіліс бұрын қабылдаған «Қылмыстық жолмен алынған кірістерді заңдастыру (жылыстату) және терроризмді қаржыландыру тәуекелдерін бағалаудың халықаралық орталығын құру туралы келісімді ратификациялау туралы» заңды мақұлдады.
Осылайша, аталған құжат парламентпен толық қабылданды және Мемлекет басшысының қол қоюына жолданады.
Қылмыстық жолмен алынған кірістерді заңдастыру (жылыстату) және терроризмді қаржыландыру тәуекелдерін бағалаудың халықаралық орталығы (ҚТБО) – ТМД елдерінің қаржы барлау бөлімшелері арасында ақпарат алмасуды ұйымдастыруға арналған халықаралық ақпараттық жүйе болып табылады. Бұл жүйе анықталған қауіптерге дер кезінде әрекет етуге мүмкіндік береді.
ҚТБО аясында қылмыскерлер қолданатын әдістер мен үрдістер, соның ішінде жаңа технологиялар да зерттелетін болады. Орталық ТМД елдеріне трансшекаралық қауіптерді талдауға, статистикалық деректермен алмасуға және тәуекелдерді төмендетуге бағытталған ұсынымдар әзірлеуге мүмкіндік береді.
