Астана. 11 мамыр. ИНТЕРФАКС-ҚАЗАҚСТАН – Тиісті халықаралық уағдаластықтарға қол жеткізілген жағдайда, Қазақстан Республикасы ирандық ядролық мәселені реттеуге көмектесуге дайын. Бұл туралы Мемлекет басшысының баспасөз қызметі хабарлады.
Мәліметке сәйкес, дүйсенбі күні Қасым-Жомарт Тоқаев Астанаға келген Бразилия Сыртқы істер министрі Мауро Виейрамен кездесті. Кездесу барысында Президент халықаралық қауіпсіздік, ядролық қарусыздану және таратпау мәселелері бойынша екі елдің күш-жігерін үйлестіру маңызды екенін атап өтті.
«Мемлекет басшысы тиісті халықаралық келісімдерге қол жеткізіліп, бұл мәселе практикалық деңгейге өткен жағдайда, Қазақстанның ирандық ядролық түйткілді шешуге ізгі ниет негізінде ықпал етуге дайын екенін білдірді», — делінген баспасөз хабарламасында.
Келіссөздер кезінде Қазақстанның ядролық қаруды таратпау саласында халықаралық деңгейде жоғары сенімге ие екені, сондай-ақ сезімтал ядролық материалдармен қауіпсіз жұмыс істеу үшін қажетті инфрақұрылымы, сараптамалық әлеуеті мен ғылыми-техникалық базасы бар екені айтылды. Айта кетерлігі, республика аумағында әлемдегі жалғыз МАГАТЭ-нің Төмен байытылған уран банкі орналасқан.
