Астана. 18 қараша. ИНТЕРФАКС-ҚАЗАҚСТАН – Қазақстан Республикасының Премьер-Министрінің орынбасары – Ұлттық экономика министрі Серік Жұманғарин Сауда және интеграция министрлігіне азық-түлік қоржынына кешенді талдау жүргізіп, бағаны тұрақтандыру шараларын әзірлеуді тапсырды. Бұл туралы Үкіметтің баспасөз қызметі хабарлады.
«Коммуналдық қызмет тарифтері уақытша тоқтатылған. Бүгінгі таңда инфляцияға әсер етіп отырған және мемлекеттік деңгейде реттеуге болатын жалғыз фактор – азық-түлік өнімдері», – деді Жұманғарин инфляцияны тұрақтандыру мәселелері жөніндегі апта сайынғы кеңесте.
Оның айтуынша, әңгіме тек әлеуметтік маңызы бар тауарлар туралы емес, мемлекеттік реттеуге жатпайтын, тұтыну қоржынына енетін барлық азық-түлік өнімдері туралы болып отыр.
«Сауда және интеграция министрлігіне азық-түлік қоржынына талдау жасап, оларға бағаны тұрақтандыру бойынша шараларды әзірлеу қажет. Сондай-ақ тауарлардың толық қадағалануын қамтамасыз етіп, артық делдалдарды жою, құжаттарды бақылау және тексеру жұмыстарын күшейту керек. Бұл нарықтың ашықтығын арттырып, шығындарды азайтады, сәйкесінше бағаларды да қолжетімді деңгейде ұстап тұруға мүмкіндік береді», – деді Жұманғарин.
Үкіметтің мәліметінше, қараша айының алғашқы екі аптасында әлеуметтік маңызы бар азық-түлік өнімдерінің бағасы 0,1%-ға өсті. Қатарынан бірнеше көкөніс түрлерінің бағасы төмендеген: сәбіз – 1,7%-ға, қырыққабат – 1,8%-ға, пияз – 0,4%-ға. Алайда картоптың бағасы артқаны байқалады: соңғы аптада +0,2%, ал екі апта ішінде +2,2%. Ел бойынша орташа бағасы – 188 теңге/кг.
Сауда және интеграция бірінші вице-министрі Айжан Бижанованың айтуынша, соңғы 4–5 аптада картоп бағасы 4,5%-ға өскен. Бұл – экспорттың жандануы салдарынан орын алған жағдай.
«Соңғы екі айда картоп экспорты 300 мың тоннаны құрады. Ал жақын арадағы экспорттық келісімшарттардың жалпы көлемі шамамен 200 мың тонна. Осылайша, біз елдің азық-түлік қауіпсіздігіне қауіп төндірмейтін 500 мың тонналық жоспарлы шекке жақындап қалдық», – деді Бижанова.
Вице-премьер Сауда министрлігіне картоп қорын қамтамасыз ету мәселесін Сыртқы саясат және халықаралық экономикалық ұйымдарға қатысу мәселелері жөніндегі ведомствоаралық комиссия отырысында қарауға шығаруды тапсырды.
Қараша айының алғашқы екі аптасында тауық жұмыртқасы мен құс етінің бағасы да 0,4%-ға өскені байқалды. Бұл, негізінен, жем мен импорттық құрамдас бөліктердің қымбаттауымен байланысты.
Осыған байланысты Серік Жұманғарин «Продкорпорацияға» құс фабрикаларын резервтегі жеммен шұғыл қамтамасыз етуді және ауыл шаруашылығы жәрмеңкелерінде арзан құс еті көлемін арттыруды тапсырды. Бұл бағаның өсу қарқынын тежеуге мүмкіндік береді.
АҚШ долларының ресми бағамы – 524,14 теңге.
