Астана. 14 қараша. ИНТЕРФАКС-ҚАЗАҚСТАН – «Қазақстан темір жолы» ұлттық компаниясы» АҚ (ҚТЖ) серіктестер мен кредиторлар алдындағы барлық міндеттемелерін орындауды жалғастырады. Компанияның жұмысы қалыпты режимде жүріп жатыр. Бұл туралы сенбі күні таратылған ҚТЖ мәлімдемесінде айтылды.
«ҚТЖ және компаниялар тобы өз қызметін қалыпты режимде жалғастырып жатыр. Инвесторлар, кредиторлар, халықаралық қаржы институттары мен іскерлік серіктестер алдындағы барлық міндеттемелер күшінде қалады және қолданыстағы келісімдердің талаптарына сәйкес орындалады», – делінген компания мәлімдемесінде.
ҚТЖ жүргізіліп жатқан тергеу аясында құқық қорғау органдарына жан-жақты көмек көрсетіп отырғанын атап өтті.
«Осы хабарлама әзірленген сәтте ҚТЖ-да аталған мәселеге қатысты жария етілген мәліметтерден басқа ақпарат жоқ», – деп толықтырды компания.
Өткен бейсенбіде Қазақстанның Ұлттық қауіпсіздік комитеті (ҰҚК) «Самұрық-Қазына» қорының басқарма төрағасы Нұрлан Жақыповтың, «Қазақстан темір жолы» ұлттық компаниясы» АҚ басқарма төрағасы Елжас Өтіншіевтің және сыбайлас жемқорлық қылмысын жасады деген күдікке ілінген басқа да адамдардың ұсталғанын хабарлады.
ҰҚК мәліметінше, күдіктілерді 11 қарашада Сыбайлас жемқорлыққа қарсы іс-қимыл қызметі ұстаған. Қазіргі уақытта істің барлық мән-жайын анықтау үшін тергеу амалдары жүргізіліп жатыр.
Нұрлан Жақыпов «Самұрық-Қазына» қорын 2023 жылдан бері басқарып келеді. Қор Қазақстанның мұнай-газ, көлік-логистика және энергетика салаларындағы стратегиялық активтерін басқарады.
Елжас Өтіншіев 2026 жылғы шілдеде Талғат Алдыбергеновтің орнына ҚТЖ басқарма төрағасы болып тағайындалды. Бұған дейін ол 2023 жылғы сәуірден бастап «Самұрық-Қазына» қорының стратегия және активтерді басқару жөніндегі басқарушы директоры – басқарма мүшесі қызметін атқарған.
ҚТЖ – Қазақстанның магистральдық теміржол желісінің операторы. Компанияның жалғыз акционері – «Самұрық-Қазына» қоры.
