Бейжің. 19 мамыр. ИНТЕРФАКС – Қытайдағы экономикалық белсенділікті бағалаудың негізгі көрсеткіштерінің бірі саналатын электр энергиясын тұтыну көлемі ағымдағы жылдың сәуір айында өткен жылдың сәйкес кезеңімен салыстырғанда 6%-ға өсіп, 820,5 млрд кВт.сағ құрады. Бұл туралы Мемлекеттік энергетика басқармасы мәлімдеді.
Соның ішінде ауыл шаруашылығы секторында тұтыну көлемі 2%-ға (11,2 млрд кВт.сағ-қа дейін), өнеркәсіп секторында – 5,3%-ға (558,4 млрд кВт.сағ-қа дейін), қызмет көрсету саласында – 8,9%-ға (151,7 млрд кВт.сағ-қа дейін) артты. Қала және ауыл тұрғындарының сұранысы 6%-ға өсіп, 99,2 млрд кВт.сағ құрады.
Қаңтар-сәуір айларында Қытайдағы жалпы электр энергиясын тұтыну көрсеткіші 5,4%-ға өсіп, 3,335 трлн кВт.сағ-қа жетті.
Бұған дейін хабарланғандай, 2025 жылдың қорытындысы бойынша Қытай Халық Республикасында электр энергиясын тұтыну көлемі 5%-ға артып, 10,37 трлн кВт.сағ құраған болатын. Бұл көрсеткіш тарихта тұңғыш рет 10 трлн кВт.сағ межесінен асып, рекордтық деңгейге жетті.
