Нью-Йорк. 27 мамыр. ИНТЕРФАКС – Оңтүстік Кореядағы Samsung Electronics Co. компаниясының ең ірі кәсіподағы қызметкерлерге төленетін бонустарды ұлғайту жөніндегі келісімді көпшілік дауыспен қолдады. Бұл шешім ауқымды ереуіл мен миллиардтаған шығынның алдын алуға мүмкіндік берді.
Bloomberg агенттігінің мәліметінше, келісімді кәсіподақ мүшелерінің шамамен 74%-ы қолдап дауыс берген.
Келісім шарттарына сәйкес, Samsung микрочип өндірісінде жұмыс істейтін қызметкерлерге сыйақы төлеуге операциялық пайданың белгілі бір бөлігін бағыттайды. Bloomberg есебіне сүйенсек, биыл осы салада еңбек ететін 78 мың қызметкердің әрқайсысына орта есеппен 513 миллион вон немесе шамамен 340 мың доллар көлемінде бонус төленуі мүмкін.
Ал компания қызметкерлерінің орташа жалақысы 2025 жылы 158 миллион вон болған.
Сарапшылар бұл жағдай компания ішіндегі әртүрлі бөлімшелер арасында шиеленісті күшейтуі ықтимал екенін айтады. Себебі чип өндірісіне қатысы жоқ қызметкерлер небәрі 6 миллион вон көлемінде бонус алады.
Samsung әлемдегі жетекші чип өндірушілерінің бірі саналады. Оларға деген сұраныстың күрт өсуі аясында компанияның нарықтық құны соңғы 12 айда 5,5 есе артқан. Жыл қорытындысы бойынша Samsung әлемдегі ең табысты компаниялардың біріне айналады деп күтілуде.
Сәрсенбі күні Сеул биржасындағы сауда қорытындысында Samsung акцияларының бағасы 2,3%-ға өсті.
