Лондон. 15 қазан. ИНТЕРФАКС – Сауд Арабиясының әскери күштері «Ансар Алла» қозғалысы (хуситтер) ұшырған зымырандар мен ұшқышсыз ұшу аппараттарының басым бөлігін атып түсіргенімен, хуситтер елдің әуе қорғанысындағы осал тұстарды пайдаланып, шабуылдарын жалғастырып жатыр. Бұл туралы Middle East Eye (MEE) басылымы дереккөзге сүйеніп хабарлады.
«Эр-Риядтағы батыстық әскери шенеуніктің айтуынша, Сауд Арабиясы зымырандар мен дрондардың басым көпшілігін, шамамен 90 пайыздан кем емес бөлігін атып түсіріп отыр. Алайда хуситтер корольдіктің әуе қорғанысын бұзып өтудің тиімді тәсілдерін тапқан», – деп жазды басылым.
«Хуситтердің қазіргі шабуылдары Иранның ақпан айындағы әрекеттеріне қарағанда әлдеқайда нәтижелі. Олар биыл көп нәрсені үйренді. Жаңа әдістерді меңгеріп, жағдайға тез бейімделеді әрі соңғы барлау мәліметтерін ұтымды пайдаланады», – деді дереккөз.
Бұған дейін хуситтер Сауд Арабиясындағы мұнай нысандары мен әуежайларға бірнеше рет шабуыл жасаған. MEE басылымының жазуынша, 2010 жылдардың ортасында Арабия түбегінде қақтығыс басталған кезбен салыстырғанда Сауд Арабиясының әлемдік экономикадағы орны мен байланысы едәуір нығайған. Сондықтан соғыс қимылдарының күшеюі елге орасан экономикалық шығын әкелуі мүмкін.
Қазан айында Сауд Арабиясы қолдайтын Йемен үкіметі хуситтерге қарсы ауқымды қарымта шабуылға шығатынын жариялады. Алайда MEE мәліметінше, «Ансар Алла» қозғалысына қарсы күресіп жатқан күштер өзара келісімге келе алмай отыр. Аймақтағы тағы бір батыстық шенеунік Йемен үкіметі әскерінің әрекетіне көңілі толмайтынын айтты.
«Соңғы айларда Йемен үкіметі әскерінің мүмкіндігі туралы көп айтылды. Бірақ іс жүзінде олардың соғыс жүргізуге шамасы жетпей жатыр. Кейбір сарбаздар азық-түлік пен сусыз шайқасуға мәжбүр. Ал кейбір әскери бөлімдер ұрыс даласынан ізін суытып, майданның қапталдарын қорғансыз қалдырған», – деді ол.
MEE дерегінше, хуситтерге қарсы соғыста Біріккен Араб Әмірліктерімен байланысы бар қарулы топтар өзгелерге қарағанда жақсы нәтиже көрсеткен. Алайда бұған дейін Сауд Арабиясы мен БАӘ Йемендегі ықпалын күшейту үшін өзара бәсекеге түскен. Соның салдарынан хуситтерге қарсы күштердің басын біріктіру қиындай түскен.
Сейсенбі күні БАӘ қолдайтын сепаратистік Оңтүстік өтпелі кеңестің жетекшісі Айдарус Қасем Абдул Азиз әз-Зубейди хуситтерге қарсы барлық күшті жұмылдыруға шақырды. Бұған дейін Йеменнен әкетілген ол қазір шетелде тұрып жатыр. Сонымен қатар әз-Зубейди халықаралық қауымдастық Йеменнің оңтүстігінде тәуелсіз мемлекет құруды мойындауы қажет екенін мәлімдеді.
Сауд Арабиясы хуситтерге қарсы күресте Йемен үкіметінің әскеріне қолдау көрсететін араб елдері коалициясын басқарады. Корольдіктің әскери авиациясы хуситтердің позицияларына соққы беріп келеді. Ал хуситтер бұған жауап ретінде Сауд Арабиясының инфрақұрылым нысандарына шабуыл жасайды.
