Астана. 17 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Анталия дипломатиялық форумына қатысу мақсатында Түркияға жұмыс сапарымен барды. Бұл туралы Мемлекет басшысының баспасөз қызметі хабарлады.
Қазіргі уақытта Президент форум өтетін NEST конгресс-орталығында. Мұнда көшбасшылардың панельдік сессиясы жоспарланған.
«Mapping Tomorrow, Managing Uncertainties» тақырыбындағы пікірталасқа Солтүстік Македония президенті Гордана Силяновска-Давкова мен Грузия премьер-министрі Ираклий Кобахидзе де қатысуда. Сессияны Түркия парламентінің депутаты, бұрынғы сыртқы істер министрі Мевлют Чавушоглу жүргізеді.
Анталия дипломатиялық форумы – саясаткерлер, дипломаттар, сарапшылар және іскер топ өкілдері бас қосатын халықаралық деңгейдегі маңызды алаң.
