Астана. 20 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев пен Ресей президенті Владимир Путин телефон арқылы сөйлесу барысында екіжақты қатынастардың күн тәртібін талқылады. Бұл туралы жұма күні Қазақстан президентінің баспасөз қызметі хабарлады.
«Қасым-Жомарт Тоқаев мамыр айының соңына жоспарланған Ресей президентінің Қазақстанға мемлекеттік сапарының екі ел арасындағы стратегиялық әріптестік пен одақтастық қатынастарды нығайтудағы маңызын атап өтті», – делінген хабарламада.
«Владимир Путин алдағы Астанада өтетін келіссөздердің маңыздылығы жөніндегі бұл бағаға қосылып, стратегиялық маңызы бар барлық салалардағы екіжақты ынтымақтастықтың дәйекті түрде дамып келе жатқанын айтты», – деп көрсетілген.
Сондай-ақ әңгіме барысында Путин Тоқаевты жалпыұлттық референдумның сәтті өтуімен және Қазақстанның жаңа Конституциясының қабылдануымен құттықтағаны хабарланды.
