Астана. 20 наурыз. ИНТЕРФАКС-ҚАЗАҚСТАН – Қазақстандағы Алатау қаласы офшорлық аймаққа айналмайды. Бұл туралы вице-премьер Қанат Бозымбаев мәлімдеді.
«Алатау қаласы офшорлық аймақ болмайды. Мұнда преференциялар тек өз қызметін тікелей Алатау қаласының аумағында жүзеге асыратын компанияларға ғана беріледі», – деді Бозымбаев жұма күні өткен брифингте.
Оның айтуынша, инвесторларға ұсынылатын барлық жеңілдіктер қала әкімшілігі беретін бизнес-лицензияларда нақты көрсетіледі. Онда бір жағынан преференциялар, екінші жағынан инвесторлардың міндеттемелері айқын жазылады.
Бұған дейін Мәжіліс пен Сенат депутаттары палаталардың бірлескен отырысында «Алатау қаласының ерекше мәртебесі туралы» конституциялық заң жобасын бірінші оқылымда мақұлдаған болатын.
Құжаттың негізгі мақсаты – қаланың жедел әрі тұрақты дамуына жағдай жасау.
Алатау жеке қаржылық модель мен арнайы басқару режимі негізінде дамытылады. Әкімшілік-салықтық режимдер енгізу, жеңілдіктер беру және инвестицияларды қолдауда дербестік қарастыру ұсынылады.
Алатау қаласы Алматы облысында 2024 жылғы қаңтарда мемлекет басшысының жарлығымен құрылған. Қаланың бас жоспары сингапурлық Surbana Jurong компаниясымен бірлесіп әзірленген. 2025 жылғы қыркүйекте президент қалаға ерекше мәртебе беру туралы жарлыққа қол қойған.
Жоспарға сәйкес, «Алатау Сити» өңірдегі толық цифрландырылған алғашқы қалаға айналады: смарт-сити технологияларын енгізуден бастап тауарлар мен қызметтерге криптовалюта арқылы төлем жасауға дейінгі мүмкіндіктер қарастырылған.
