Лондон. 10 шілде. ИНТЕРФАКС – Ұлыбритания премьер-министрі Кир Стармер мен Франция президенті Эммануэль Макрон бейсенбі күні қол қоятын жаңартылған келісім аясында екі ел Storm Shadow алыс қашықтыққаарналған қанатты зымырандарының қорын ұлғайтады. Бұл туралы Ұлыбритания үкімет басшысының кеңсесі хабарлады.
«Жаңа келісім Ұлыбритания мен Францияны алыс қашықтыққа және кемеге қарсы бағытталған зымырандар бойынша бірлескен жобаның келесі кезеңін бастауға міндеттейді. Бұл Storm Shadow зымыранын алмастыратын түпкі жоба нұсқасын айқындауға жақындатады», – делінген ресми хабарламада.
Storm Shadow зымырандарының қосымша тапсырысы арсеналды толықтырумен қатар, жоғары білікті мамандардың жұмыс орындарын сақтап қалуға және жаңаларын ашуға мүмкіндік береді. Сонымен бірге өндірістік желілер жаңғыртылады.
Келісімге сәйкес, сонымен қатар, Ұлыбритания Корольдік Әскери-әуе күштерінің жойғыш ұшақтары үшін көру шегінен тыс әрекет ететін жаңабуын «әуе-әуе» класты зымырандарды бірлесіп әзірлеу көзделген.
Бұған дейін BMFTV телеарнасы Елисей сарайына сілтеме жасай отырып, Макрон мен Стармер бейсенбі күні ядролық тежеу күштерінің үйлестірілген әрекетіне қатысты бірлескен декларацияға қол қоятынын хабарлаған болатын.
Телеарна мәліметінше, құжат Еуропа елдерін «төтенше қатер» жағдайында бірлесіп қорғау шараларына бағытталған. Алайда Париж бен Лондон қандай нақты қадамдарға баратыны нақтыланбаған.
Сондай-ақ, декларацияда Франция мен Ұлыбританияның ядролық тежеу күштері «тәуелсіз күйінде қалатыны», бірақ олардың әрекеттері үйлестірілуі мүмкін екені атап көрсетілген.
Айта кетейік, қазіргі уақытта президент Эммануэль Макрон ресми сапармен Ұлыбританияда жүр.
