Вашингтон. 29 мамыр. ИНТЕРФАКС — АҚШ билігі бұрынғы Куба көшбасшысы Рауль Кастроны ел аумағына жеткізу үшін барлық мүмкіндікті пайдаланатын болады. Бұл туралы АҚШ-тың бас прокуроры міндетін атқарушы Тодд Бланш мәлімдеді.
«Кастроға қатысты да, шетелде айып тағылған кез келген адамға қатысты да мақсат бір – айыптау актісі қағаз жүзіндегі құжат қана емес. Негізгі міндет – заң аясында айыпталушыны АҚШ-қа жеткізіп, сот алдында жауапқа тарту. Әдетте бұл экстрадиция рәсімі арқылы жүзеге асады және біз халықаралық серіктестермен бірлесіп жұмыс істейміз», – деді Бланш Fox News арнасына берген сұхбатында.
Оның айтуынша, осы жылдың қаңтар айының басында арнайы операция нәтижесінде биліктен шеттетіліп, АҚШ-қа жеткізілген Венесуэла президенті Николас Мадуромен байланысты жағдай ерекше мысал болып саналады.
«Біз мұны көрсетілім үшін жасап отырған жоқпыз. Бізге Кастроның АҚШ-та болғаны қажет. Оны осында жеткізу үшін қолдан келгеннің бәрін жасаймыз», – деп атап өтті Бланш.
АҚШ Әділет министрлігі өткен сәрсенбі күні 94 жастағы Рауль Кастроға және тағы бес адамға қатысты айыптарды жариялаған болатын. Оларға 1996 жылы АҚШ-тағы кубалық эмигранттар құрған Hermanos al Rescate гуманитарлық ұйымына тиесілі екі америкалық ұшақтың апатқа ұшырауына байланысты АҚШ азаматтарын өлтіру және кісі өлтіруге сөз байласу баптары бойынша айып тағылып отыр.
