Қазақстан Республикасы Ұлттық ұланының хабарлауынша, Мәскеу қаласындағы Халықаралық самбо орталығында Жауынгерлік самбо лигасының мерейтойлық турнирі өтті. Бұл турнир 2025 жылы бесінші рет ұйымдастырылды. Лига тарихында жауынгерлік самбо әлеміндегі ең беделді әрі қағидатты жобалардың біріне айналып, Ресей мен шет елдердің мықты спортшыларын біріктіріп келеді. Ресей Федерациясының астанасында Жауынгерлік самбо лигасы Гран-приінің шешуші кезеңі өтті. Турнирге Қазақстан, Ресей, Тәжікстан, Қырғызстан және Камерун елдерінің өкілдері қатысты. Кілем төрінде әлем чемпиондары, еңбек сіңірген спорт шеберлері мен ұлттық құрамалардың көшбасшылары бақ сынасты. Бұл – жарыстың халықаралық деңгейінің жоғары екенін айғақтады. Тартысты және ымырасыз бәсекенің қорытындысы бойынша Қазақстан Республикасы Ішкі істер министрлігі Ұлттық ұланының әскери қызметшісі — 6697 әскери бөлімінің жедел мақсаттағы 1-батальоны, автомобиль взводының 1-автомобиль бөлімшесінің аға жүргізушісі, аға маман ефрейтор Мәлік Байсұлтанов бірінші орынды иеленді. Мәлік Байсұлтановтың сенімді өнер көрсетуі мен кәсіби дайындығы жоғары спорттық шеберлік пен кәсібиліктің жарқын үлгісі. Гвардия жауынгерінің халықаралық аренадағы жеңісі — Қазақстан Республикасы ІІМ Ұлттық ұланы әскери қызметшілерінің дене және жауынгерлік дайындығының жоғары деңгейде екенін тағы бір мәрте дәлелдейді.
Евразия24 пікірі:
Қазақстандық күштік құрылым қызметкерлерінің спорттағы жоғары нәтижелері – халықаралық жарыстарда ел беделін нығайтып қана қоймай, қызметтік міндеттерді тиімді орындауға да тікелей ықпал етеді. Жекпе-жек түрлерінен спорт шебері мәртебесіне ие қызметкердің құқық қорғау құрылымдарында қызмет атқаруы — кәсіби даярлық пен қызметтік тиімділік тұрғысынан қарапайым қызметкермен салыстырғанда анағұрлым басым. Бұл – жұмыс нәтижесіне де оң әсер етеді. Соңғы жылдары Қазақстан әскери қызметшілері халықаралық деңгейдегі беделді жарыстарға тұрақты түрде қатысып жоғары деңгейдегі тәжірибе мен жүлделі орындармен оралуда. Мәселен, 2016 жылы Қазақстан Қарулы Күштерінің командасы Халықаралық армия ойындарында (International Army Games) 23 номинацияның 21-іне қатысып, жалпыкомандалық есепте 2-орын алды. Бұл көрсеткіш қатысушы елдердің көпшілігінен жоғары болды. Сондай-ақ, Халықаралық әскери спорт кеңесінің (CISM) аясында өткен әскери әлем чемпионаттарының бірінде еліміздің әскери қызметшілері күрес түрлерінен 8 медаль жеңіп алды, оның ішінде грек-рим күресінен алтын медаль бар. 2025 жылы әскери қол күресі бойынша жастар арасындағы әлем чемпионатында қазақстандық арнайы мақсаттағы бөлімше өкілдері алтын және күміс медаль еншіледі. Ташкент қаласында өткен самбодан ардагерлер арасындағы Азия чемпионатында Ұлттық ұланның қатардағы әскери қызметшісі алтын медаль жеңіп алды. Мұндай мысалдар көп және олар Қазақстан әскери қызметкерлерінің жоғары кәсіби және спорттық даярлығын көрсетеді.
