Астана. 31 желтоқсан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Еуразиялық экономикалық одаққа мүше елдердің жасанды интеллект саласындағы ынтымақтастығын күшейтіп, оны жауапты дамыту туралы бірлескен мәлімдеме қабылдауды ұсынды.
Мемлекет басшысы ЕАЭО елдері басшыларына жолдаған үндеуінде жаңа технологияларды халықтардың игілігіне бағыттау және оларды еуразиялық экономикалық интеграцияның негізгі факторына айналдыру маңызды екенін атап өтті. Оның айтуынша, 2026 жылы Астанада өтетін Еуразиялық экономикалық форум аясында ЕАЭО шеңберінде жасанды интеллектіні жауапты дамыту жөніндегі бірлескен мәлімдемеге қол қою ұсынылады.
Президенттің бағалауынша, бұл құжат интеграциялық бірлестік экономикаларын цифрлық трансформациялау саласындағы ынтымақтастықтың жаңа бағытын айқындайды.
Қасым-Жомарт Тоқаев Қазақстанның стратегиялық мақсаты толыққанды цифрлық мемлекетке айналу екенін айтты. Ол осы бағыттағы нақты қадамдар ретінде Астанада Alem.ai орталығының іске қосылуын және Алатауда CryptoCity пилоттық аймағының құрылуын мысалға келтірді. Бұл бастамалар елдің цифрлық экожүйені белсенді дамытуға дайын екенін көрсетеді.
Сонымен қатар Президент Қазақстанның ЕАЭО елдерімен жасанды интеллект, цифрлық реттеу және экономиканы трансформациялау салаларында білім мен тәжірибе алмасуға ашық екенін атап өтті. Оның пікірінше, бірлескен күш-жігер жаңа технологиялық жағдайларға тиімді бейімделуге мүмкіндік береді.
