Лондон/Вашингтон. 3 қаңтар. ИНТЕРФАКС – Венесуэла оппозициясының өкілдері президент Николас Мадуро мен оның жұбайының елден шығарылуын келісілген әрекет ретінде бағалап отыр, деп Sky News телеарнасы хабарлайды.
Бұған дейін CBS телеарнасы ресми тұлғаларға сілтеме жасай отырып, Мадуро мен оның жұбайы АҚШ-тың арнайы “Delta” жасағының операциясы барысында тұтқындалып, елден шығарылғанын хабарлаған.
Венесуэла вице-президенті Делси Родригес президенттің қазіргі орналасқан жері белгісіз екенін айтып, АҚШ-тан оның тірі екендігіне дәлел ұсынуды талап етті. “Президент Мадуро мен бірінші ханымның қайда екенін білмейміз. Біз Трамп әкімшілігінен олардың тірі екенін растайтын айғақтарды талап етеміз”, – деді ол латиноамерикалық БАҚ-қа берген мәлімдемесінде.
АҚШ президенті Дональд Трамп сенбі күні таңертең өзінің Truth Social парақшасында мәлімдеме жасап, Америка Құрама Штаттарының Венесуэлаға қарсы ірі әскери операция жүргізгенін, соның нәтижесінде Николас Мадуро мен оның жұбайының тұтқындалып, әуе жолымен елден шығарылғанын растады. “АҚШ Венесуэлаға табысты соққы жасады, оның көшбасшысы Николас Мадуро мен әйелі тұтқындалып, әуе арқылы елден шығарылды”, – деп жазды Трамп.
