Астана. 8 қаңтар. ИНТЕРФАКС-ҚАЗАҚСТАН – Сингапурлық Xinfa Group индустриялық холдингі Павлодар облысында толық циклді ауқымды индустриялық парк құруға шамамен 15 млрд АҚШ долларын инвестициялауды жоспарлап отыр. Бұл туралы Қазақстан Үкіметінің баспасөз қызметі хабарлады.
Инвестициялық өзара іс-қимыл мәселелері мен жобаны іске асырудың практикалық қырлары Премьер-Министрдің бірінші орынбасары Роман Склярдың Xinfa Group басқарма төрағасының орынбасары Чжао Тинъюнмен кездесуі барысында талқыланғаны атап өтілді.
Индустриялық парк тұжырымдамасы көмір, боксит, мыс, флюорит және әктас негізінде терең өңдеуді көздейді. Атап айтқанда, глинозем, алюминий және мыс өндіретін металлургиялық өндірістерді салу, жаңартылатын энергия көздеріне негізделген нысандарды қоса алғанда, энергетикалық инфрақұрылымды қалыптастыру, сондай-ақ сода, көміртекті материалдар мен экологиялық таза құрылыс шешімдерін шығаратын кәсіпорындарды іске қосу жоспарланып отыр.
Болашақ индустриялық парктің аумағы 3 мың гектардан асады.
Xinfa Group компаниясында Қазақстанның ресурстық базасына алдын ала талдау жүргізілгені және боксит, көмір мен мыс кен орындарының терең өңдеу тізбектерін қалыптастырып, жоғары қосылған құны бар өнім өндіру үшін әлеуеті жоғары екені оң бағаланатыны айтылды.
