Finance.kz хабарлайды: “Қаржы министрлігі Ұлттық қор қаражатының түсуі мен пайдаланылуы туралы ай сайынғы есепті жариялады. Құжатқа сәйкес, 2026 жылдың 1 қаңтардағы жағдай бойынша Ұлттық қорға түскен түсім көлемі 10,21 трлн теңгені, ал алынған қаражат көлемі 5,30 трлн теңгені құрады. 2025 жылдың қорытындысы бойынша қорды толықтыру көлемі алынған қаражатпен теңескен жоқ. Он екі ай ішінде Ұлттық қордан жалпы сомасы 5,30 трлн теңге пайдаланылды. Оның ішінде республикалық бюджетке берілген кепілдендірілген трансферт – 2 трлн теңге, нысаналы трансферт – 3,25 трлн теңге. Қорды басқаруға және жыл сайынғы сыртқы аудитті жүргізуге 54,38 млрд теңге жұмсалды. 2026 жылдың 1 қаңтардағы жағдай бойынша Ұлттық қордағы қаражат көлемі 39,64 трлн теңгені құрайды. Ал 2025 жылы 1 қаңтарда бұл көрсеткіш 34,73 трлн теңге болған.
Евразия24 пікірі:
Ұлттық қор бастапқыда болашақ ұрпақтың мүддесіне арналған жинақтаушы қаржы институты ретінде құрылды. Оның негізгі мақсаты – экономикалық қолайлы кезеңдерде қаражат жинақтау және қолайсыз жағдайларда макроэкономикалық тәуекелдерді жұмсарту болатын. Алайда ресми есептерге сәйкес, 2025 жылы Қазақстан экономикасы оң өсім көрсеткеніне және мұнай бағасының күрт төмендеуі байқалмағанына қарамастан, Ұлттық қордан бөлінген нысаналы трансферттердің көлемі жоғары деңгейде сақталған. Бұл жағдай бюджеттік модельдің Ұлттық қор қаражатынсыз тұрақты жұмыс істеу қабілеті әлі де шектеулі екенін көрсетеді. Сонымен қатар қаражат алу құрылымы да алаңдаушылық туғызады. Жоспарланған 2 трлн теңге көлеміндегі кепілдендірілген трансфертке қоса, 3,25 трлн теңге көлемінде нысаналы трансферт бөлінген. Осылайша, алынған қаражаттың едәуір бөлігі жоспардан тыс сипатқа ие. Мұндай тәжірибе бюджеттік шығыстар мен кірістерді құрылымдық қайта қарауға бағытталған реформалардың орнына уақытша қаржылық тетіктерді қолдану үрдісінің сақталып отырғанын аңғартады. Ұлттық қордың квазибюджеттік тұрақтандыру құралы ретіндегі рөлі қанша уақытқа дейін жалғасатыны әзірге айқын емес.
2025 жылдың қорытындысы бойынша Ұлттық қор көлемінің ұлғаюы оның институционалдық тұрақтылығының артқанын білдірмейді. Қордың өсімі негізінен активтердің инвестициялық кірістілігі есебінен қамтамасыз етілген және фискалдық тәртіптің күшеюімен тікелей байланысты емес.
