Вашингтон. 18 қаңтар. ИНТЕРФАКС — АҚШ президенті Дональд Трамптың әкімшілігі Газа мәселесін реттеу жөніндегі өзі бастамашы болған Бейбітшілік кеңесінің жұмысына үш жылдан астам мерзімге қатысқысы келетін елдерден 1 млрд доллар көлемінде жарна төлеуді ұсынуда. Бұл туралы жексенбі күні Bloomberg агенттігі хабарлады.
Агенттіктің қолына түскен ұйым жарғысының жобасына сәйкес, әрбір мүше мемлекет кеңес құрамында үш жылдан аспайтын мерзімге кіре алады. Алайда, егер мемлекет жарғы күшіне енген алғашқы жылдың ішінде Кеңеске 1 млрд доллардан астам көлемде қолма-қол қаржы енгізсе, бұл шектеу қолданылмайды. Мұндай жағдайда мүшелік мерзімін ұзарту туралы шешімді төраға қабылдайды.
Жарғы жобасында АҚШ президенті Кеңестің алғашқы төрағасы болатыны және ұйымға қай елдердің қабылданатынын өзі айқындайтыны көрсетілген. Шешімдер көпшілік дауыспен қабылданады, әрбір қатысушы мемлекет бір дауысқа ие болады, алайда барлық шешімдер түпкілікті түрде төрағаның мақұлдауынан өтуі тиіс.
Құжатта Кеңес «қақтығыс аймақтарында немесе қақтығыс қаупі бар өңірлерде тұрақтылықты нығайтуға, сенімді әрі заңды басқаруды қалпына келтіруге және орнықты бейбітшілікті қамтамасыз етуге ұмтылатын халықаралық ұйым» ретінде сипатталады.
Bloomberg атап өткендей, сыншылар Трамп бұл бастама арқылы БҰҰ-ға балама немесе бәсекелес құрылым құруға тырысуы мүмкін деп алаңдайды.
Бұған дейін Дональд Трамп Газа бойынша Бейбітшілік кеңесін құру туралы мәлімдеген болатын. Ақ үйдің хабарлауынша, кеңес құрамына АҚШ мемлекеттік хатшысы Марко Рубио, Трамптың арнайы өкілі Стив Уиткофф, АҚШ президентінің күйеу баласы әрі инвестор Джаред Кушнер, Ұлыбританияның бұрынғы премьер-министрі Тони Блэр, Дүниежүзілік банк президенті Ажай Банга және АҚШ ұлттық қауіпсіздік жөніндегі кеңесшісінің орынбасары Роберт Гэбриел енген.
