Лондон, 19 қаңтар. ИНТЕРФАКС — Виски, коньяк және текилаға деген сұраныстың бұрын-соңды болмаған деңгейде төмендеуі әлемдегі жетекші алкоголь өндірушілерінің қоймаларында сатылмаған өнім қорының едәуір көлемде жиналуына алып келді. Бұл туралы Financial Times газеті хабарлады.
Аталған жағдай компанияларды өндірістік кәсіпорындардың бір бөлігін уақытша тоқтатуға және қоймадағы қорды азайту мақсатында өнім бағасын төмендетуге мәжбүр етіп отыр.
Financial Times компаниялардың қаржылық есептіліктеріне сүйене отырып жүргізген есептеулерге сәйкес, әлемдегі бес ірі алкоголь өндірушінің — Diageo, Pernod Ricard, Campari, Brown-Forman және Remy Cointreau — сатылмаған өнім қорының жиынтық көлемі шамамен 22 млрд АҚШ долларын құрайды. Бұл көрсеткіш соңғы он жылдан астам уақыттағы ең жоғары деңгей болып отыр.
Франциялық коньяк өндіруші Remy Cointreau компаниясында қор көлемі 1,8 млрд еуроны құрайды. Бұл оның жылдық түсімінен шамамен екі есе көп әрі компанияның нарықтық капитализациясына жуық.
Басылымның атап өтуінше, күшті алкоголь өндірушілерінде сатылмаған өнім қорының ұлғаюы олардың қарыз жүктемесін арттырып, баға соғысының басталу қаупін күшейтуде.
«Қордың өсуі бұрын-соңды болмаған сипатқа ие», — дейді Bernstein компаниясының талдаушысы Тревор Стирлинг. Оның айтуынша, мұндай деректерді жариялайтын компанияларда сатылмаған алкоголь қоры қазіргі таңда қаржы дағдарысы кезеңіндегі деңгейден де асып түскен.
Өнім қоры COVID-19 пандемиясы кезінде алкоголь тұтыну күрт артқан соң, компаниялар өндірісті жедел түрде ұлғайтқаннан кейін жинақтала бастаған.
«2021 және 2022 жылдары барлығы шектен шығып, мұндай сұраныс мәңгі сақталады деп ойлады», — дейді Стирлинг.
Алайда инфляцияның жедел күшеюі саланы шынайы жағдайға қайта әкелді. Соңғы жылдары әлемде халықтың қолда бар табысының азаюы күшті алкогольге деген сұранысты әлсіретті. Соның салдарынан саланың көптеген компаниялары қаржылық көрсеткіштердің нашарлағанын хабарлап, кадрлық өзгерістерге және акционерлердің кетуіне тап болды.
Инвесторлар сұраныстың төмендеуіне тереңірек қоғамдық өзгерістердің қаншалықты әсер етіп отырғаны жөнінде пікірталас жүргізіп жатыр. Кейбір сарапшылар алкоголь тұтынудың азаюын, ең алдымен, Wegovy және Ozempic сияқты салмақ төмендетуге арналған дәрілердің кең таралуымен, сондай-ақ адамдардың денсаулыққа деген жалпы назарын күшейтуімен байланыстырады.
