Астана. 20 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев үкіметке елдегі көмір мен электр энергиясын өндіру саласына 20 наурызға дейін ұлттық жоба мәртебесін беруді тапсырды.
«Көмір генерациясына ұлттық жоба мәртебесін беру қажет. Үкіметке осы мәселені 20 наурызға дейін шешу тапсырылды», – деді Тоқаев сейсенбі күні Қызылордада өткен V Ұлттық құрылтайда сөйлеген сөзінде.
Президент күн тәртібінде маңызды жобаларды жедел іске асыру міндеті тұрғанын атап өтті. Атап айтқанда, Көкшетау, Семей және Өскемен қалаларында жаңа ЖЭО (ТЭЦ) салу қажет.
«Мойындау керек, бұл мәселенің шешімі созылып кетті, ал халық күтіп отыр. Менің наразылығым үкіметке және “Самұрық-Қазына” қорына бағытталған», – деді мемлекет басшысы.
Президенттің айтуынша, Курчатов қаласындағы электр станциясын уақытында іске қосу, ГРЭС-2-де қосымша энергия блоктарын енгізу және Екібастұзда ГРЭС-3 құрылысын бастау қажет.
«Қазақстан көмірдің орасан зор қорына ие – шамамен 33 млрд тонна. Қазіргі тұтыну деңгейінде бұл қор 300 жылға жетеді. Жыл сайынғы көмір өндіру көлемі 110 млн тоннадан асады, бұл елімізді әлемдегі алдыңғы қатарлы мемлекеттердің қатарына шығарды», – деп қосты Тоқаев.
Ол көмірдің стратегиялық актив екенін атап өтіп, қоршаған ортаға келетін зиянды толықтай бейтараптандыратын ең жаңа технологияларды қолдана отырып, оны толық пайдалану қажет екенін айтты.
«Президент Трамптың “маған көмір ұнайды, маған жел ұнамайды” деген сөзі дұрыс. Мұнда белгілі бір деңгейде рационалды ой бар», – деп түйіндеді ол.
