Брюссель. 22 қаңтар. ИНТЕРФАКС-ҚАЗАҚСТАН – НАТО алдағы айларда Арктикада оқу-жаттығу шараларын өткізуді жоспарлап отыр. Бұл туралы бейсенбі күні Альянстың Әскери комитетінің төрағасы Джузеппе Каво Драгоне мәлімдеді.
«Арктиканың стратегиялық маңыздылығын тағы бір мәрте растадық және жақын айларда НАТО оқу-жаттығуларын өткізуді жоспарлап отырмыз», – деді ол баспасөз мәслихатында.
Журналистердің сұрақтарына жауап бере отырып, Драгоне қазіргі уақытта Дания мен АҚШ арасында Гренландияға қатысты әскери ынтымақтастық бойынша қандай да бір нақты уағдаластықтар бар екенінен бейхабар екенін айтты.
«Біз әзірге бастапқы кезеңдеміз. Әрине, Дания мен АҚШ арасындағы шеңберлік келісім туралы хабардармыз, бірақ тиісті нұсқаулықтарды күтіп отырмыз. Кейін өз жұмысымызды бастаймыз», – деді ол.
Бұған дейін Давоста өткен форумда АҚШ Президенті Дональд Трамп еуропалық бірқатар елдерге кедендік баж салығын енгізу жоспарын тоқтатқанын мәлімдеді. Оның айтуынша, бұл шешім НАТО Бас хатшысы Марк Рюттемен Гренландия мәселесі бойынша одан әрі келіссөздер жүргізуге негіз болатын уағдаластыққа қол жеткізгеннен кейін қабылданған.
Сондай-ақ Трамп Гренландияға бақылау орнату үшін күш қолданбайтынын айтты. Алайда Данияның сыртқы істер министрі Ларс Лекке Расмуссен АҚШ-тың Гренландия үшін әлі де қауіп төндіретінін атап өтті.
Axios порталы өз дереккөздеріне сілтеме жасай отырып, Гренландия бойынша талқыланып жатқан келісім АҚШ-қа аралдың егемендігін бермейтінін, бірақ онда «Алтын күмбез» зымыранға қарсы қорғаныс жүйесін орналастыруға рұқсат беретінін хабарлады.
Сондай-ақ жоспар 1951 жылғы АҚШ пен Дания арасындағы келісімді жаңартуды көздейді. Бұл келісім Вашингтонға аралда әскери базалар салуға мүмкіндік берген болатын.
Портал дереккөздерінің айтуынша, жоспар Гренландиядағы қауіпсіздікті арттыру және Арктикадағы НАТО қызметін күшейту бөлімдерін, сондай-ақ табиғи ресурстарды игеру жөніндегі қосымша жұмыстарды қамтиды.
