Астана. 26 қаңтар. ИНТЕРФАКС-ҚАЗАҚСТАН – Қазақстанда конституциялық реформа аясында билік сабақтастығының моделі өзгертілуі мүмкін. Бұл туралы Әділет министрі Ерлан Сарсембаев мәлімдеді.
«Билік сабақтастығының моделін өзгерту ұсынылып отыр. Егер Президент өз өкілеттігін мерзімінен бұрын тоқтатса, елді уақытша басқару вице-президентке өтеді. Ал ол мүмкін болмаған жағдайда – Құрылтай төрағасына, одан кейін Премьер-Министрге жүктеледі», – деді министр дүйсенбі күні Конституциялық комиссияның кезекті отырысында.
Министрдің айтуынша, вице-президенттің өкілеттігі бірқатар шектеулермен айқындалады. Атап айтқанда, вице-президент өкілді органның депутаты бола алмайды, өзге ақы төленетін қызметтерді атқаруға, кәсіпкерлікпен айналысуға және саяси партиялардың мүшесі болуға құқығы жоқ.
«Мұндай талаптар бұл лауазымның саясиландырылмаған әрі кәсіби сипатын қалыптастырады», – деп атап өтті Ерлан Сарсембаев.
Сонымен қатар министрдің еске салуынша, вице-президент Мемлекет басшысының тапсырмасы бойынша елдің халықаралық деңгейдегі өкілдігін қамтамасыз етеді, биліктің негізгі институттарымен өзара іс-қимыл жасайды, сондай-ақ азаматтық қоғаммен, ғылыми, мәдени және сараптамалық қауымдастықтармен диалогты дамытуға жауапты болады. Бұл өкілеттіктер базалық сипатқа ие және қажет болған жағдайда Президент тарапынан нақтылануы мүмкін.
Егер вице-президент Президент өкілеттігін өзіне қабылдай алмаса, бұл өкілеттіктер Құрылтай төрағасына, ал ол мүмкін болмаған жағдайда Премьер-Министрге беріледі.
«Президент өкілеттігін қабылдаған тұлға тиісінше вице-президенттің, Құрылтай төрағасының немесе Премьер-Министрдің өкілеттігін тоқтатады. Мұндай жағдайда бос қалған мемлекеттік лауазымдар Конституцияда көзделген тәртіппен толтырылады. Бұл қоғам үшін мемлекеттің кез келген сыртқы немесе ішкі жағдайға қарамастан, дәйекті әрі құқықтық алаңда әрекет ететініне толық сенімділік береді», – деді министр.
Қолданыстағы Конституцияға сәйкес, Президент өз өкілеттігін мерзімінен бұрын тоқтатқан, қызметінен шеттетілген немесе қайтыс болған жағдайда оның өкілеттігі қалған мерзімге Сенат төрағасына өтеді. Егер Сенат төрағасы бұл өкілеттікті қабылдай алмаса, ол Мәжіліс төрағасына, ал ол мүмкін болмаған жағдайда Премьер-Министрге беріледі.
