Астана. 26 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Үкіметке және Ұлттық қауіпсіздік комитетіне елдегі көші-қон есебін жүргізу үдерістерін кешенді түрде цифрландыруды жеделдетуді тапсырды.
«Көші-қонды реттеу саласында толық цифрландыру жүргізу қажет. Бұл – біз көптен бері айтып келе жатқан аса өзекті мәселе, алайда оң өзгерістер әзірге мардымсыз», – деді Мемлекет басшысы Бас прокуратурада өткен кеңесте. Президенттің сөзін оның баспасөз қызметі келтірді.
Мемлекет басшысы әлемде көші-қон ағындарының артып келе жатқанын атап өтіп, мұндай жағдайда Қазақстан транзиттік хаб ретінде де, шетелдік мигранттардың ұзақ мерзімге келіп тұрақтауы үшін тартымды ел ретінде де ерекшеленетінін айтты.
«Осыған байланысты шетел азаматтарының уақытша есебін жүргізу және олардың қозғалысын бақылау жүйелерін жаңғырту көші-қонды тиімді бақылауды қамтамасыз етудегі басым міндетке айналып отыр. Үкіметке ҰҚК-мен бірлесіп, бұл бағыттағы жұмысты жеделдетуді тапсырамын», – деді Президент.
