Астана. 27 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Израиль Сыртқы істер министрі Гидеон Саармен ынтымақтастық мәселелерін талқылады. Бұл туралы мемлекет басшысының баспасөз қызметі хабарлады.
«Кездесу барысында сауда-экономикалық және ғылыми-техникалық өзара іс-қимылды жандандыруға, сондай-ақ жасанды интеллект, ауыл шаруашылығы және су ресурстарын басқару салаларында бірлескен жобаларды іске асыруға ерекше назар аударылды», – делінген сейсенбі күні таратылған ақпаратта.
Қасым-Жомарт Тоқаев Саардың Астанаға сапары аясында қазақстандық-израильдік бизнес-форумның өтуін құптап, оның қорытындылары екі ел арасындағы инвестициялық әріптестікті кеңейтуге нақты үлес қосатынын атап өтті.
Өз кезегінде Израильдің сыртқы істер министрі мемлекетаралық қатынастарды сапалық тұрғыдан жаңа деңгейге шығару үшін Қазақстанмен ынтымақтастықты дамытуға елеулі серпін беруге Израиль мүдделі екенін жеткізді.
Гидеон Саар Қазақстанның Авраам келісімдеріне қосылу туралы шешімін жоғары бағалап, бұл қадам өңірлік тұрақтылықты, бейбітшілік пен халықаралық диалогты одан әрі нығайтуға ықпал ететінін айтты.
Сондай-ақ Израиль Сыртқы істер министрі Қазақстанда жүзеге асырылып жатқан ауқымды саяси және әлеуметтік-экономикалық реформаларды жоғары бағалап, олардың табысты іске асатынына сенім білдірді.
Бұдан бөлек, кездесу барысында халықаралық күн тәртібіндегі өзекті мәселелер бойынша пікір алмасу болғаны хабарланды.
