Астана. 27 қаңтар. ИНТЕРФАКС-ҚАЗАҚСТАН – Қазақстан мен Израиль ұлттық паспорт иелерін визалық талаптардан босату жөнінде үкіметаралық келісім жасасуды көздеп отыр. Бұл туралы Қазақстан Сыртқы істер министрлігінің баспасөз қызметі хабарлады.
«Саяси консультациялардың 12-кезеңінің қорытындысы бойынша дипломатиялық кадрларды даярлау және қоғамдық дипломатия салаларындағы ынтымақтастық туралы меморандумдарға, сондай-ақ туристік алмасуларды дамыту мақсатында Қазақстан Республикасы Үкіметі мен Израиль Мемлекеті Үкіметі арасында ұлттық паспорт иелерін визадан босату туралы келісімге қол қою ниеті жөніндегі меморандумға қол қойылды», – делінген Астанада Қазақстан мен Израиль сыртқы істер министрлері Ермек Көшербаев пен Гидеон Саар арасындағы келіссөздер қорытындысы бойынша таратылған баспасөз хабарламасында.
Кездесу барысында тараптар саяси диалогтың қазіргі жай-күйі мен даму перспективаларын, сауда-экономикалық және инвестициялық байланыстарды, туризм саласындағы өзара іс-қимылды, сондай-ақ ғылым, білім беру және денсаулық сақтау бағыттарындағы тәжірибе алмасу мәселелерін талқылады. Сонымен қатар технологиялар трансфері және екі елдің бейінді ведомстволары мен іскерлік топтары арасындағы практикалық ынтымақтастықты кеңейтуге ерекше назар аударылды.
Сапар аясында екі елдің сыртқы саяси ведомстволары арасында саяси консультациялардың 12-кезеңі өтті. Оның барысында халықаралық және өңірлік күн тәртібіндегі өзекті мәселелер, соның ішінде Таяу Шығыста бейбіт реттеуге жәрдемдесу және сенімді нығайтуға бағытталған бастамалар қаралды. Осы тұрғыда Қазақстанның Газа бойынша Бейбітшілік кеңесінің қызметіне қатысуы, сондай-ақ Авраам келісімдері шеңберіндегі өзара іс-қимыл мәселелері бойынша пікір алмасу жүргізілгені хабарланды.
