Астана. 4 ақпан. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста екінші оқылымда «Қауіпсіз еңбек жағдайларын жетілдіру және қызметкерлердің еңбек құқықтарын қорғау мәселелері бойынша кейбір заңнамалық актілерге өзгерістер мен толықтырулар енгізу туралы» заңды қабылдады.
Заң жобасы бір топ депутаттың бастамасымен әзірленген және қызметкерлердің еңбек құқықтарын қорғау саласындағы заңнаманы жетілдіруге, сондай-ақ еңбек қауіпсіздігін басқару жүйесінің тиімділігін арттыруға бағытталған.
Құжатпен Еңбек кодексіне және «Халық денсаулығы және денсаулық сақтау жүйесі туралы» кодекске өзгерістер енгізіледі.
Атап айтқанда, Еңбек кодексіне ұйымдардағы ұжымдық шарттарда белгілі бір кәсіп немесе лауазым бойынша ең жоғары және ең төменгі жалақы мөлшерлерінің арақатынасын белгілеу, келісу комиссиясының жұмысына делдалды тарту, сондай-ақ еңбек қызметінің кемінде бір белгісі болған жағдайда жеке тұлғамен азаматтық-құқықтық сипаттағы шарт жасасуға тыйым салу нормаларын енгізу көзделген.
Бұған дейін Мәжіліс депутаты Асхат Аймағамбетов ең жоғары және ең төменгі жалақы арасындағы рұқсат етілген арақатынасты белгілеу қазақстандық және шетелдік қызметкерлер арасындағы еңбекақы айырмашылығы мәселесін шешуге мүмкіндік беретінін атап өткен болатын.
Сонымен қатар әкелерге берілетін бала күтімі демалысын еңбек өтіліне есепке алу нормасы енгізіледі. Ұжымдық шарттарға еңбек қызметіне байланысты жазатайым оқиғалар кезінде төленетін жәрдемақылар мен өтемақыларды қоса алғанда, төлемдер қарастыру туралы ережелерді енгізу де көзделген.
Одан бөлек, әлеуметтік қорғау саласында арнайы әлеуметтік қызметтер көрсету қызметін лицензиялау мәселелері бойынша түзетулер қарастырылған, сондай-ақ мәслихаттардың «Облыстың (қаланың, ауданның) Құрметті азаматы» атағын беру қағидаларын әзірлеу және бекіту жөніндегі өкілеттіктері толықтырылады.
«Халық денсаулығы және денсаулық сақтау жүйесі туралы» кодекске өндірістік жарақаттың ауырлық дәрежесін айқындау қағидаларын бекітуге қатысты өкілеттіктер енгізіледі.
Қабылданған заң Сенаттың қарауына жолданады.
