Астана. 4 ақпан. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста «Еуразиялық экономикалық одақ пен оған мүше мемлекеттер, бір тараптан, және Моңғолия, екінші тараптан, арасындағы уақытша сауда келісімін ратификациялау туралы» заңды қабылдады.
ЕАЭО мен Моңғолия арасындағы келісімге 2025 жылғы 27 маусымда Минск қаласында қол қойылған.
Мәжілістің экономикалық реформа және өңірлік даму жөніндегі комитетінің қорытындысына сәйкес, келісімнің негізгі мақсаты – ЕАЭО елдері мен Моңғолия арасындағы сауда байланыстарын дамыту және нығайту, сондай-ақ қазақстандық тауарлардың Моңғолия нарығына шығуына қолайлы жағдай жасау.
Отырыста Сауда және интеграция вице-министрі Жанель Қушукова келісімнің мазмұнына тоқталып, құжат 367 тауарлық позиция бойынша импорттық кедендік баждарды алып тастайтынын айтты. Оның сөзінше, келісім үш жыл мерзімге жасалады және тағы үш жылға автоматты түрде ұзартуды көздейді. Ал алғашқы үш жылдық кезең аяқталғаннан кейін тараптар толық форматтағы еркін сауда туралы келісім жасау жөнінде келіссөздер бастайды.
Қабылданған заң Сенаттың қарауына жолданады.
