Астана. 14 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Италияда өткен Олимпиада ойындарында алтын медаль жеңіп алған мәнерлеп сырғанаушы Михаил Шайдоровты II дәрежелі «Барыс» орденімен марапаттау туралы шешім қабылдады. Бұл туралы Мемлекет басшысының баспасөз хатшысы Айбек Смадияров хабарлады.
«Мемлекет басшысы Қасым-Жомарт Тоқаев Михаил Шайдоровты қысқы Олимпиада ойындарының чемпионы атануымен құттықтады. Құттықтауда отандық спорт тарихындағы мәнерлеп сырғанаудан алғашқы алтын медальдің тарихи маңызы зор ірі жетістік екені атап өтілген. Президент Михаилға жоғары шеберлігі мен жеңіске деген қайсарлығы үшін алғыс білдірді», — деп жазды Смадияров сенбі күні өзінің Telegram-арнасында.
Баспасөз хатшысының айтуынша, Мемлекет басшысы Михаил Шайдоровты II дәрежелі «Барыс» орденімен марапаттау туралы шешім қабылдап, сондай-ақ жаттықтырушылар құрамына, Мәнерлеп сырғанау федерациясына және бейінді министрлік басшылығына атқарған жұмысы үшін ризашылығын білдірген.
