Астана. 14 ақпан. ИНТЕРФАКС-ҚАЗАҚСТАН — Қазақстан мен Ресейдің уәкілетті мемлекеттік органдары Қазақстан аумағында атом электр станциясын (АЭС) салуға қатысты келісу жұмыстарын жалғастырып жатыр. Бұл туралы «Интерфакс-Қазақстан» агенттігінің сауалына жауап ретінде Қазақстанның Атом энергиясы агенттігі мәлімдеді.
Агенттіктің хабарлауынша, ресейлік технологиялар негізінде АЭС салу жобасын іске асыру мақсатында Қазақстан Республикасы мен Ресей Федерациясы арасындағы АЭС құрылысы бойынша ынтымақтастықтың негізгі қағидаттары және мемлекеттік экспорттық кредит тарту туралы үкіметаралық келісімдердің жобалары әзірленген. Қазіргі кезде бұл құжаттар екі елдің мүдделі мемлекеттік органдарының қарауында және келісу сатысында.
Мекеме мәліметінше, Алматы облысының Жамбыл ауданында басталған инженерлік-іздестіру жұмыстары шеңберінде геофизикалық зерттеулер жүргізіліп, 60 ұңғыма бұрғыланған, зертханалық талдау үшін топырақ пен судың шамамен 1000 сынамасы алынған, сондай-ақ гидрогеологиялық зерттеулер аяқталған.
«Қазіргі уақытта ықтимал құрылыс алаңдарының аэрометеорологиялық, гидрологиялық және өзге де табиғи жағдайларын бір жылдық цикл шеңберінде бақылау жалғасып жатыр», — деп атап өтті агенттік.
Бұған дейін Ресейдің Қазақстандағы елшісі Алексей Бородавкин «Россия 24» телеарнасының эфирінде Қазақстандағы алғашқы АЭС салу жобасы құқықтық рәсімдеу тұрғысынан аяқталуға жақын қалғанын айтқан болатын.
Елшінің сөзінше, тараптар ұйымдастырушылық, құқықтық және техникалық сипаттағы келісімдер топтамасын, сондай-ақ жобаны қаржыландыру үшін Ресейдің мемлекеттік экспорттық кредитін ұсынуға қатысты құжаттарға қол қоюға жақын. Барлық материалдар келісудің соңғы кезеңінде қаралуда.
Бұған дейін хабарланғандай, Қазақстанда бірнеше атом электр станциясын салу жоспарланып отыр. Алғашқы АЭС-ті «Росатом» компаниясы салуы көзделген, құрылыс мерзімі шамамен 11 жылды құрап, нысанды 2035–2036 жылдары пайдалануға беру жоспарлануда. Балқаш маңындағы Үлкен кенті жанында зерттеу жұмыстары 2025 жылғы 8 тамызда басталды.
