Informburo хабарлайды: «Қазақстан мектептерінде есеп беру мақсатында ұйымдастырылатын форумдар мен жиындардың саны шектеледі. Ведомство өкілдері бұл шаралардың Мемлекет басшысының тапсырмасына сәйкес, шығындарды оңтайландыру аясында қолға алынғанын жеткізді. «Білім саласына бөлінген қаржы мен күш-қуат бұдан былай ресми іс-шараларға емес, оқу сапасын көтеруге жұмсалады. Тек көрсеткіш үшін өткізілетін басқосулар мен кеңестерді барынша азайту көзделіп отыр. Республикалық және аймақтық деңгейдегі шаралар тізімі қайта қаралып, сүзгіден өткізіледі. Мемлекет тарапынан тек білім беру мазмұнын жетілдіруге бағытталған жобаларға ғана қолдау көрсетіледі», – делінген ресми мәлімдемеде. Сонымен қатар, мектептердегі техникалық қауіпсіздік талаптарының орындалуы, бейнебақылау құрылғыларының үздіксіз жұмысы, күзет бөлімдерінің қызметі мен оқушылардың психологиялық жағдайы жіті қадағаланады».
Еуразия24 пікірі:
Өкінішке қарай, ведомство енді қажетсіз деп танылған форумдар мен жиындарға бюджеттен қанша қаржы кеткенін нақтылаған жоқ. Дегенмен, біздің ойымызша, педагогика — шығармашылық сала, сондықтан озық тәжірибе алмасу оқыту әдістемесін жетілдіру үшін аса маңызды. Егер форумдар болмаса, мұғалімдер бұл мәселені тағы қай жерде талқыламақ? Негізінде, білім саласында бюджет қаражатын үнемдеудің бұдан да басқа тиімді жолдары жетерлік. Мәселен, мазмұны бірдей оқулықтарды жиі қайта жазуды тоқтатуға болады. Мұны алыстан іздеудің де қажеті жоқ. Жоғары аудиторлық палатаның соңғы есебіне көз жүгіртсек жеткілікті. Онда білім беру стандарттары саласындағы реформалардың жүйесіз жүргізіліп жатқандығы анық жазылған. Оқу жоспарларының тым жиі өзгеруі басылып шыққан оқулықтарды қайта қарауға және бюджет қаржысының тиімсіз жұмсалуына әкеп соқтырған. Соңғы 5 жылдың ішінде оқулықтарды қайта басып шығару салдарынан болған экономикалық шығын 16 млрд теңгеден асқан. Сондықтан, елдің білім деңгейін көтеруге тікелей атсалысып жүрген мамандарға келетін шығынды үнемдеу — онша қисынды бастама емес.
