Астана. 25 ақпан. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев катарлық Power International Holding (PIH) компаниясының басшылығымен энергетика және телекоммуникация салаларындағы бірлескен инвестициялық жобаларды іске асыру мәселесін талқылады.
Мемлекет басшысының баспасөз қызметінің хабарлауынша, Ақордада компания төрағасы Муатаз Әл-Хаят және Рамез Әл-Хаятпен кездесу өтті.
Келіссөздер барысында газ саласындағы бірлескен жобаларды жүзеге асыру перспективаларына, оның ішінде газды өңдеу, тасымалдау және энергия өндіру бағыттарына ерекше назар аударылды.
«Мемлекет басшысы газды өңдеу, тасымалдау және энергия генерациясы саласындағы ауқымды жобалар қазақстан-катар инвестициялық ынтымақтастығының негізгі бағыты екенін және еліміздің энергетикалық қауіпсіздігін нығайтуға елеулі үлес қосатынын атап өтті», – делінген кездесу қорытындысы бойынша таратылған хабарламада.
Сонымен қатар президентке PIH компаниясының Қазақстанның телекоммуникация нарығындағы қызметін кеңейту жоспарлары, атап айтқанда Mobile Telecom Service (Tele2) компаниясын сатып алу мәмілесі аясындағы ниеттері туралы ақпарат берілді.
Тоқаев инвестордың қатысуы телекоммуникациялық инфрақұрылымды жаңғыртуға, қызмет көрсету сапасын арттыруға және олардың халық үшін қолжетімділігін кеңейтуге ықпал ететініне сенім білдірді.
Кездесу қорытындысында тараптар ынтымақтастықты одан әрі нығайтуға және перспективалы инвестициялық жобаларды бірлесіп жүзеге асыруға дайын екендерін растады.
Бұған дейін хабарланғандай, Тоқаевтың Қатарға сапары барысында Power International Holding иелері Муатаз Әл-Хаят пен Рамез Әл-Хаятпен әңгіме кезінде Қашағандағы газ өңдеу зауыттарының құрылысы, «Бейнеу–Бозой–Шымкент» газ құбырының екінші желісі, сондай-ақ Ақтөбе–Қостанай магистральдық газ құбыры мен жаңа компрессорлық станция жобалары талқыланған. Президент бұл жобалар Қазақстанның энергетикалық қауіпсіздігін күшейтуге зор үлес қосатынын атап өткен.
Сондай-ақ мемлекет басшысы Қазақстан үкіметі тарапынан катарлық инвесторларға қолайлы жағдай жасалатынын растады және аталған жобаларды жоғары деңгейде іске асырудың маңыздылығын атап өтті.
Power International Holding — Муатаз Әл-Хаят пен Рамез Әл-Хаят негізін қалаған катарлық конгломерат. Компания портфелі бас мердігерлік, девелопмент, ауыл шаруашылығы және азық-түлік өндірісі, сән индустриясы, ойын-сауық және қонақжайлық, сондай-ақ қызмет көрсету салаларын қамтиды.
