Kursiv мәліметінше: «Қазақстанда қаңтар айында қосылған құн салығы бойынша жоспардың 20%-ы орындалмай қалды деген ақпарат тараған болатын. Алайда Мемлекеттік кірістер комитетінде бұл деректер нақты жағдайды толық көрсетпейтінін мәлімдеді. Ведомствоның түсіндіруінше, өткен жылдың IV тоқсаны бойынша бірқатар негізгі төлемдердің мерзімі 2026 жылдың 25 ақпанына сәйкес келген. 1 наурыздағы деректерге сәйкес, жыл басынан бері бюджетке 2,9 трлн теңге салық түскен, бұл жоспардың 113,7%-ын құрайды. Осы күнге дейін қосылған құн салығының орындалуы 119,8% деңгейінде болды: жоспарланған 1,28 трлн теңгенің орнына 1,53 трлн теңге жиналған. Ал корпоративтік табыс салығы бойынша өсім қарқыны 116,9%-ды құрап, түсім 118 млрд теңгеге артқан. Мемлекеттік кірістер комитетінің бағалауынша, екі айдың қорытындысы бюджет кірістерінің жоғары деңгейде орындалып отырғанын көрсетеді және асығыс қорытынды жасауға негіз жоқ».
Еуразия24 пікірі:
Жақында Қаржы министрлігі 1 ақпандағы жағдай бойынша республикалық бюджеттің атқарылуы туралы есепті жариялаған. Соған сәйкес, салық түсімдері жоспарланған 851,3 млрд теңгенің орнына 941,8 млрд теңгені құрады (+10,6%). Корпоративтік табыс салығы (КТС) қазынаға 436,4 млрд теңге әкелді (жоспардағы 418,7 млрд теңгеден +4,2%-ға артық), ал қосылған құн салығы небәрі 249,9 млрд теңге болды (болжанған 311,8 млрд теңгеден -19,8%-ға аз). Формалды тұрғыдан алғанда, Мемлекеттік кірістер комитетінің түсіндірмесінде белгілі бір қисын бар: салықтарды төлеу мерзімдеріне байланысты қаңтар айында уақытша кассалық алшақтықтың туындауы мүмкін. Сонымен қатар қаңтар айының есебі жарияланған кезде маусымдық және төлем мерзімдеріне байланысты факторларға жеткілікті түсіндірме берілмегені назар аудартады. Алдымен алаңдататын көрсеткіштің жарияланып, кейіннен оның қосымша түсіндірмемен нақтылануы ақпараттық коммуникациядағы жүйелілік мәселесін көрсететіндей әсер қалдырады.
