Астана. 4 наурыз. ИНТЕРФАКС-ҚАЗАҚСТАН – Қазақстан Парламентінің Мәжілісі жалпы отырыста Қазақстан Үкіметі мен Дүниежүзілік банк тобына кіретін ұйымдар – Халықаралық қайта құру және даму банкі, Халықаралық қаржы корпорациясы және Инвестицияларға кепілдік берудің көпжақты агенттігі арасындағы серіктестік жөніндегі рамалық келісімді ратификациялады. Құжат Қазақстанның тұрақты дамуы мен экономикалық өсіміне қолдау көрсету мақсатында ынтымақтастықты кеңейтуге бағытталған.
Аталған рамалық келісімге Үкімет 2025 жылғы 18 маусымда қол қойған.
Мәжілістің қорытындысында көрсетілгендей, құжат Қазақстан мен Дүниежүзілік банк тобы ұйымдарының өзара іс-қимылының құқықтық негізін айқындайды. Бұл банктің саясаты мен рәсімдеріне сәйкес бірлескен жобаларды іске асыруға мүмкіндік береді.
«Рамалық келісім аясындағы ынтымақтастықтың негізгі бағыттары: қаржы секторының макроэкономикалық және фискалдық тұрақтылығын нығайту; инфрақұрылымды жаңғырту; ауыл шаруашылығы саласын дамытуға жәрдемдесу; шағын және орта бизнес үшін қаржыландыруға қолжетімділікті кеңейту; инфрақұрылымдық және әлеуметтік салаларға, оның ішінде денсаулық сақтау мен білім беру жүйесіне инвестиция көлемін арттыру», – делінген құжатта.
Сонымен қатар келісімде елдегі стратегиялық реформаларды қолдауға бағытталған бірлескен іс-шаралардың негізгі бағыттары айқындалған.
Құжат Парламент Сенатының қарауына жолданды.
